नागपूर : महाराष्ट्रात ईडीने छापासत्र सुरु केलंय. ईडीने आपला मोर्चा आता नागपूरमध्ये वळवला आहे. राज्याचे परिवहन मंत्री आणि रत्नागिरीचे पालकमंत्री अनिल परब यांचे निकटवर्तीय मानले जाणारे बजरंग खरमाटेंच्या निवासस्थानी ईडीची धाड पडली आहे. काल ईडीने अनिल परब यांना नोटीस पाठवल्यानंतर आज परबांच्या निकटवर्तीय अधिकाऱ्यावर छापा टाकण्यात येतो आहे. खरमाटे त्यांच्यावर भ्रष्टाचाराचा आरोप लावण्यात आला होता. ईडीने काही कागदपत्रे ताब्यात घेतले आहेत. त्यात काही पुरावे मिळतात का, हे पाहणं निर्णायक ठरणार आहेत. मात्र अनिल परबांकडून धाडसत्राच्या बातम्यांचं खंडन करण्यात आलं आहे.

काल अनिल परब यांना ईडीची नोटीस पाठवण्यात आली होती. याबाबतची माहिती ट्विट करत शिवसेनेचे खासदार संजय राऊत यांनी दिली होती. अनिल परब यांना आता येत्या मंगळवारी हजर राहण्याचे आदेश या नोटीशीमध्ये देण्यात आले आहेत.

दरम्यान, आज शिवसेनेच्या खासदार भावना गवळी यांच्या पाच संस्थांवर आज ईडीने छापेमारी केली आहे. भाजपचे नेते किरीट सोमय्या यांनी घोटाळ्याचे आरोप केले होते. त्यानंतर ही ईडी चौकशी झाली आहे. ईडीने केलेल्या कारवाईबाबत खासदार भावना गवळी म्हणाल्या, ''भाजपने जुलमी सत्र सुरू केले आहे. मला कुठलीही ईडीची नोटीस आलेली नाही. माझ्या काही संस्थामध्ये ईडीचे अधिकारी आले आहेत. ते चौकशी करत आहेत. आणीबाणीसारखी वागणूक दिली आहे. सर्व शिवसेनेच्या लोकांना टार्गेट केले जात आहे.''