नागपूर : वॉश कोलच्या वापरामुळे दैनंदिन उत्पादन करण्याकरिता लागणाऱ्या विजेचा व तेलाची खपत कमी होण्यास मदत झाली. तसेच वीज उत्पादनाची कार्यक्षमतासुद्धा वाढल्याचा दावा खापरखेडा महाऔष्णिक विद्युत केंद्राचे मुख्य अभियंत्यांनी केला आहे.

जय जवान जय किसान संघटनेचे अध्यक्ष प्रशांत पवार यांनी वॉश कोलमुळे वीज निर्मितीत कुठलीही वाढ झाली नसल्याचा आरोप पत्रकार परिषदेत केला होता. पुराव्यादाखल खापरखेडा औष्णिक केंद्राच्या अभियंत्यांनी माहिती अधिकार कायद्यांतर्गत दिलेल्या आकडेवारीची प्रत सादर केली होती.

याचा खुलासा करताना मुख्य अभियंत्यांनी वॉश कोलचा शंभर टक्के वापरामुळे उपलब्धता, लोडॲबिलीटी व प्लांट लोड फॅक्टर वाढण्यास मदत होते तसेच कोळशाची खपत ही कमी झाल्याचे दिसून येते, असे सांगितले आहे. कोराडी औष्णिक वीज निर्मिती येथे शंभर टक्के वॉश कोलचा वापर केल्यामुळे वीज निर्मिती मध्ये वाढ झाली आहे.

खापरखेडा येथील संचात २०१२-१३ ते २०२०-२०२१ या कार्यकाळात वॉश कोलचा वापर करण्यात आला नाही. एप्रिल २०२१ ते डिसेंबर २०२१ या कालावधीत वॉश कोलचा वापर सुमारे २,७७,४४४ मेट्रिक टन इतका करण्यात आला. एप्रिल ते डिसेंबर २०२१ या कालावधीत रॉ कोलचा वापर हा १८,५०,००६ मेट्रिक टन इतका करण्यात आला. वॉश कोल व रॉ कोलचा वापर एकूण २१,२७,४४९ मेट्रिक टन करण्यात आला. कोळश्याच्या तुटवडा निर्माण झाल्या मुळे एप्रिल ते डिसेंबर २०२१ या कालावधीत एकूण वापरलेल्या कोळश्याच्या केवळ १३.०४ टक्के वॉश कोलचा वापर करण्यात आल्याचे त्यांनी कळविले आहे.