नागपूर : सिद्धांत हा आईवडिलांसह राहायचा. आईवडील सेवानिवृत्त शासकीय अधिकारी आहेत. त्याला एक बहीण असून, ती शासकीय वैद्यकीय महाविद्यालय व रुग्णालयात (मेडिकल) वैद्यकीय अभ्यासक्रमाला आहे. त्याने अभियांत्रिकीचे शिक्षण नुकतेच पूर्ण केले. तो नोकरीच्या शोधात होता. कोरोनामुळे देशभरात लॉकडाऊन जाहीर झाले. यामुळे अनेक कंपन्यांनी मनुष्यबळात कपात करायला सुरुवात केली. त्यामुळे नवीन रोजगाराच्या संधी बंद झाल्या. आता आपल्याला नोकरी मिळणार नाही, असे त्याला वाटायचे. त्याचा ताण सिद्धांतने घेतला. 

कोरोनामुळे आता उच्चशिक्षित असूनही नोकरी मिळणार नाही, असे टेन्शन घेतल्याने नैराश्‍यात सापडलेला युवा अभियंता सिद्धांत संजय कडू (22, रा. अर्चित पॅलेस, नरेंद्रनगर) याने घरात गळफास घेऊन आत्महत्या केली. ही घटना बेलतरोडी पोलिस ठाण्यांतर्गत शनिवारी उघडकीस आली. 

गेल्या काही दिवसांपासून तो प्रचंड तणावात होता. शुक्रवारी रात्री जेवण केल्यानंतर रात्री 11 ते 12 दरम्यान त्याने स्वत:च्या खोलीत गळफास घेऊन आत्महत्या केली. पहाटे 4 वाजेच्या सुमारास त्याचे वडील संजय भीमराव कडू हे उठले असता त्यांना सिद्धांतच्या खोलीचा दरवाजा लोटलेला दिसला. त्यांनी डोकावून बघितले असता त्यांना सिद्धांत गळफास घेतलेल्या अवस्थेत दिसला. वडिलांनी ताबडतोब डॉक्‍टरांना बोलावले. डॉक्‍टरांनी तपासून सिद्धांतला मृत घोषित केले. 

जाणून घ्या : मध्यरात्री कोविड केअर सेंटरमध्ये माजली खळबळ; काय झाले असे?

जर मी नसलो तर... 
सिद्धांतने आत्महत्येपूर्वी चिठ्ठी लिहून ठेवली. त्यात त्याने 'आईबाबा, तुम्ही प्रेमाने राहा. मी आत्महत्या करीत आहे. मला माफ करा,' असे लिहिलेली सुसाइड नोट दिसली. दोन दिवसांपूर्वी जेवण असताना त्याने आईवडिलांना 'मी जर या दुनियेत नसेल तर तुम्हाला काय फरक पडेल?' असा प्रश्‍न केला होता. त्यावेळी आईवडील त्याच्या प्रश्नाचे उत्तर देऊ शकले नाही, अशा शब्दात हळहळ व्यक्त करण्यात येत आहे.