नागपूर - नागपुरातील मेडिकल कॉलेज. दर दिवशी कोणत्यातरी विषयामुळे चर्चेत असते मेडिकल.मंगळवारी (ता.७) एक नवीच चर्चा पुढे आली. दोन वर्षांपूर्वी तयार झालेल्या स्वच्छतागृहांवर तासभराची चर्चा रंगली असून मेडिकल कॉलेज परिसरातील अवघ्या दोन स्वच्छतागृहांच्या नुतनीकरणावर तब्बल ३५ लाख रुपये खर्च केला. नुतनीकरणावर ३५ लाखाचा खर्च केल्यानंतरही या स्वच्छतागृहाचा वापर मात्र अद्याप कोणीच केला नाही. दोन्ही स्वच्छतागृह कुलूपबंद ठेवली आहेत. ही दोन्ही स्वच्छतागृह वापरामुळे अस्वच्छ होतील या भीतीने याचा वापर होत नाही का? असा सवाल मेडिकल कॉलेजमधील कर्मचाऱ्यांनी केला आहे.

दोन वर्षांपूर्वी मेडिकलचे अधिष्ठाता डॉ. सजल मित्रा होते. त्यांनी मेडिकल कॉलेजमध्ये असलेल्या ४ स्वच्छता गृहापैकी १० बाय १० च्या दोन स्वच्छतागृहांना अत्याधुनिक रुप देण्याचा निर्णय घेतला. त्यानुसार सार्वजनिक बांधकाम विभागामार्फत दोन्ही स्वच्छतागृह तयार केली आहेत. प्रत्येकी १७ ते १८ लाखाचा खर्च एका स्वच्छतागृहावर झाला. असे दोन स्वच्छतागृह तयार करण्यात आले. यासाठी सुमारे ३५ लाखांचा खर्च आला आहे. बांधकाम विभागाने या दोन्ही स्वच्छतागृहांचे हस्तांतरण मेडिकल प्रशासनाला केले आहे. मात्र या स्वच्छतागृहांचा वापर होत नसल्याची जोरदार चर्चा मेडिकल कर्मचाऱ्यांमध्ये रंगली आहे.

चोरी होऊ नये म्हणून…

मेडिकल प्रशासनाने तयार केलेल्या अत्याधुनिक अशा दोन स्वच्छतागृहाचा सर्रास वापर सुरू केला तर या स्वच्छतागृहात असलेल्या नळ व इतर साहित्यांची चोरी होण्याची भीती व्यक्त होत आहे. चोरीच्या भीतीपोटी पुरुषांसाठी तयार करण्यात आलेल्या या स्वच्छतागृहाचा वापर होत नसल्याचे सूत्रांनी सांगितले. तर महिलांसाठी तयार केलेल्या १८ लाखांच्या स्वच्छतागृहाचा वापर होत असून ज्या महिलेस स्वच्छतागृहाचा वापर करावयाचा आहे, ते किल्ली घेतात, वापर करतात, पुन्हा किल्ली संबंधिताकडे देतात, या तत्त्वावर वापर सुरू असल्याचे सांगण्यात आले. मात्र काहींच्या मते सुरूच करण्यात आले नसल्याची माहिती पुढे आली. प्रशासनाला विचारले असता, त्यांनी नुसते स्मित हास्य केले आणि शांत झाले.