Zero Shadow : काहीही झाले तरी आपली सावली आपल्याला कधीही सोडून जात नाही, असे म्हटले जाते. पण, २६ मे रोजी दुपारी १२ ते १२.०५ या कालावधीत काही मिनिटांसाठी काही क्षणांसाठी का होईना, सावली तुमची साथ सोडणार आहे.

नागपूर जिल्ह्यातील काही ठिकाणी ही स्थिती अनुभवता येणार आहे. वर्षातून दोनदा पृथ्वीच्या वैशिष्ट्यपूर्ण स्थितीमुळे ‘झिरो शॅडो डे’ अनुभवता येतो. नागपूरसह विदर्भातील चंद्रपूर, भंडारा, गोंदिया, वर्धा, यवतमाळ, अकोला, अमरावती, गडचिरोली येथील नागरिकांनाही येत्या काही दिवसांत हा अनुभव घेता येणार आहे.

पृथ्वी ज्या पातळीवरून सूर्याची परिक्रमा करते, त्या पातळीला पृथ्वीचा अक्ष कललेला आहे. वर्षभरात पृथ्वीच्या वेगवेगळ्या अक्षांशांवर सूर्य किरणे क्रमाक्रमाने वेगवेगळ्या दिवशी लंब पडतात आणि ज्या अक्षांशावर सूर्याची किरणे लंब पडतात, त्या अक्षांशावरच्या लोकांना सुमारे मिनिटभर आपली सावली हरवल्याचा अनुभव येतो.

हाच अनुभव उपराजधानीसह राज्यातील अनेक शहरातील नागरिकांना घेता येणार आहे. वर्षातून दोनदा ही भौगोलिक स्थिती आपल्याला अनुभवता येते. काही क्षणांसाठी आपली सावली अगदी पायाशी येते जणू ती नाहीशी होते, अशी माहिती खगोल अभ्यासक प्रा. सुरेश चोपणे यांनी दिली.

कधी असतील शून्य सावली दिवस

२४ मे- उमरेड

२६ मे -नागपूर

२७ मे - सावनेर, काटोल, रामटेक

२८ मे - नरखेड

विविध शहरात विविध दिवशी अनुभव

भौगोलिक आणि वैज्ञानिकदृष्ट्या हे महत्त्वाचे शून्य सावली दिवस महाराष्ट्रात आजपासून सुरू झालेले आहे. ३१ मे पर्यंत राज्यातील विविध शहरांमध्ये तो अनुभवता येणार आहे. विशेष म्हणजे भारतात २३.५० अंशाच्या पुढे दिल्ली, हिमाचल प्रदेश, कश्मीर या राज्यात कुठेही शून्य दिवस घडत नाही. आज सावंतवाडी येथे शून्य दिवस अनुभवता आला. दक्षिणायन सुरू झाल्यानंतर पुन्हा भोपाळ ते अंदमान भागात पावसाळ्यात शून्य सावली दिवस येतात असेही प्रा. चोपणे यांनी सांगितले.