खापरखेडा/सिल्लेवाडा : सिल्लेवाडा कोळसा खाणीतील बंद असलेल्या ६ सेक्शनमध्ये मेन्टेनन्सचे काम करीत असताना स्फोट झाल्याने दोन कामगार गंभीररित्या भाजले. तर आठ किरकोळ जखमी झाले. ही घटना मंगळवारी सायंकाळी सातच्या सुमारास घडली. मात्र, घटनेतील वेगवेगळ्या चर्चेने वातावरण अधिकच तापले होते.

सिल्लेवाडा येथील ६ क्रमांकांच्या सेक्शनमधील कोळसा खाण गेल्या अनेक दिवसांपासून बंद आहे. या खाणीच्या देखभालीसाठी कामगार नियमित जात असत. मंगळवारी सायंकाळी स्कॅनिंगचे काम सुरू असताना अचानक स्फोट झाला. स्फोटात दोन कामगार गंभीररित्या भाजले गेले.

स्कॅनिंगच्या कामावर १० कामगार असल्याची माहिती पुढे आली. यामधील चार कामगार गंभीर जखमी झाले असून त्या चौघांनाही नागपूर येथे खासगी रुग्णालयात हलविण्यात आले. यापैकी दोघांची प्रकृती अत्यवस्थ आहे. तर इतर सहा कामगारांवर वलनी वेकोलि रुग्णालयात उपचार सुरू आहेत. नेमके जखमी झालेले कंत्राटी कामगार की वेकोली कर्मचारी यांची माहिती बातमी लिहोस्तर मिळू शकली नाही. अंडरग्राऊंड मॅनेजरच्या सतर्कतेमुळे मोठी दुर्घटना टळली अशी चर्चा घटनास्थळी कामगार वर्तुळात सुरू होती.

अशीच घटना मागील काही वर्षापूर्वी घडलेली होती. मंगळवारी घडलेल्या घटनेने येथील वेकोलि कर्मचारी, कंत्राटी कामगारांचा सुरक्षेवर पुन्हा प्रश्नचिन्ह निर्माण झाले आहेत. या घटनेला जबाबदार कोण?, याची चौकशी करून संबंधितांवर कारवाई करण्याची मागणी पुढे आली आहे.अपघाताने अधिकारी वर्गात खळबळ उडाली होती.

सात कामगारांच्या मृत्यूची अफवा !

सिल्लेवाडा कोळसा खाणीत झालेल्या स्फोटात सात कामगार जळून खाक झाल्याची अफवा सायंकाळपासून सुरू होती. मात्र, रात्री ११ च्या सुमारास दोन कामगार जखमी झाल्याचे पुढे आले. अफवेमुळे सर्वत्र भीतीचे वातावरण होते. दुसरीकडे वेकोलिचे अधिकारी मोबाईल कॉलला प्रतिसाद देत नसल्यामुळे संशयाचे धुके अधिकच गडद होताना दिसून आले.

घटनेतील जखमींची नावे

जखमी जवानांमध्ये सेक्शन इन्चार्ज अनिल बोबडे, कुलदीप उईके (एमटी), अनिल सिंग ट्रेनी, विलास मुढे, राजू शामराव मिसरी, महिपाल, योगेश्वर यांचा समावेश आहे. अमोल बोधले , अनिल सिंह, रामचंद्र गया प्रसाद पाल,मनोज गुप्ता, किशोर घेर आदी किरकोळ जखमी झाले.