नागपूर : शहराच्या पॉश धंतोली भागातील बहुमजली इमारतीतील फ्लॅटला लागलेल्या आगीत ५० लाखांचे साहित्य जळून राख झाले. एकाच मालकाचे दोन फ्लॅटमधील फर्निचर, इलेक्ट्रॉनिक वस्तू, कपडे आदी सर्वच आगीत जळाले. अग्निशमन विभागाने तीन तासांत आगीवर नियंत्रण मिळवले.

धंतोली उद्यानाच्या बाजूला विघ्नहर्ता अपार्टमेंट ही बहुमजली इमारत आहे. सकाळी नऊ वाजताच्या सुमारास दुसऱ्या माळ्यावरील फ्लॅट क्रमांक २०१ व २०२ मध्ये आग लागली. सूरज प्रकाश नाझिया यांच्या मालकीचे दोन्ही फ्लॅट आहेत. संयुक्त कुटुंब असल्याने घरात सात ते आठ नागरिक होते. सकाळी घरातील महिला सदस्य हॉलमध्ये योगा करीत होते. त्यांना बेडरूमधून धूर बाहेर येत असल्याचे दिसले. त्यांनी तत्काळ घरातील इतर सदस्यांना सावध करीत बाहेर काढले. त्याही बाहेर आल्या. त्यांनी घटनेची माहिती अग्निशमन विभागाला दिली.

अग्निशमन विभागाचे चार बंब घटनास्थळी पोहोचले. परंतु, आगीवर पाण्याचा मारा करीत असताना आगीने घरातील सर्वच साहित्य कवेत घेतले. तीन तास आगीवर पाण्याचा मारा करीत अग्निशमन विभागाने नियंत्रण मिळवले. परंतु, फ्लॅटमधील कुठलेही साहित्य वाचले नाही. फ्लॅटमधील टीव्ही, तीन एसी, कपड्यांच्या आलमारी, फर्निचर, गिझर, वाशिंग मशीन सर्वच साहित्य जळाले. त्यामुळे घरात केवळ राखच दिसून आली. त्यामुळे नाझिया कुटुंब चांगलेच हादरले. घरातील सर्व कपडेही जळाल्याने त्यांच्यापुढे मोठा प्रश्न उपस्थित झाला.

दागिणेही जळाले

या आगीत घरातील साहित्यांसोबतच सोने, चांदीचे दागिनेही जळाले. ही इमारत जुनी असून इलेक्ट्रिक वायरिंगही तेवढीच जुनी आहे. शॉर्ट सर्किटमुळे आग लागल्याचा प्राथमिक अंदाज आहे. दागिण्यांसह एकूण ५० लाखांचे साहित्य जळाले.