नागपूर : अनोळखी तरुणीने फोन करून गुंतवणुकीची इच्छा व्यक्त केली. तिला भेटीसाठी गेलेल्या व्यक्तीला तीन आरोपींनी पकडले. एटीएममधून 20 हजार रुपये काढण्यास भाग पाडून बळजबरीने रक्कम हिसकावून नेली. दिवसाढवळ्या तरुणाची फसवणूक झाल्याची ही घटना गुरुवारी दुपारी घडली. या प्रकारामुळे खळबळ उडाली असून, आरोपींना पकडणे पोलिसांसमोर आव्हान ठरले आहे.

सेमिनरी हिल्स येथील फॉरेस्ट सोसायटीमध्ये राहणारे सुजय गोडसे (39) गुंतवणुकीशी संबंधित कमे करतात. गुरुवारी दुपारी 1.45 वाजताच्या सुमारास त्यांना अनोळखी क्रमांकावरून फोन आला. पलीकडून बोलणाऱ्या तरुणीने रिया बोलत असल्याचा परिचय दिला. गुंतवणुकीची इच्छ व्यक्त केली. शंकांचे समाधान करायचे असल्याचे सांगून कर्वेनगर येथील प्लॉट क्रमांक 42 येथे भेटीसाठी बोलावून घेतले. सुजय तिथे पोहोचताच 20 ते 25 वर्षे वयोगटातील तीन अनोळखी आरोपी दोन दुचाकीवरून तिथे आले.

अवश्य वाचा- स्कूलव्हॅनचालक आर्थिक संकटात! व्हॅनमधील कोरोना प्रादुर्भावाचे काय?

आरोपींनी बळजबरीने सुजयच्या शर्टच्या खिशातील एटीएम कार्ड काढून घेतले. त्यानंतर एका दुचाकीवर बसवून सोमलवाडा चौकाजवळील आयसीआयसीआय बॅंकेजवळ नेले. धमकावून एटीएममधून 20 हजार रुपये काढण्यास भाग पाडले. पैसे काढताच ही रक्कम हिसकावून आरोपी पसार झाले. याप्रकरणी सोनेगाव पोलिसांनी जबरी चोरीचा गुन्हा दाखल केला आहे. नागपुरात सायबर क्राईम तसेच फसवणुकीच्या घटना दिवसेंदिवस वाढत असल्याने नागरिकांमध्ये भीतीचे वातावरण आहे. आरोपींना पकडणे पोलिसांसमोर आव्हान ठरत आहे.