नागपूर : बॅंकेतून गृहकर्ज मिळवून देण्याच्या नावावर रोख रकमेसह बनावट धनादेश तयार करीत ४६ लाखांची फसवणूक केल्याची घटना बजाजनगर पोलिस ठाण्याच्या हद्दीत घडली. पोलिसांनी याप्रकरणी रोहित भैय्याजी माडेवार ( वय ४५, रा. मेघदूत, हुडकेश्वर) याच्याविरुद्ध गुन्हा दाखल केला. दिनेश दामोदर मारशेट्टीवार (रामेश्वरी) यांना घराचे बांधकाम करायचे होते. त्यासाठी त्यांनी काचीपुरा येथील श्रीराम तेंडुलकर यांच्या कार्यालयात आरोपी रोहित माडेवार याची भेट घेतली.

रोहितने दिनेश यांना साडेचार कोटींचे गृहकर्ज मिळवून देण्याचे आश्वासन दिले. त्यासाठी ३० जुलै २०२० रोजी बँकेच्या करारनाम्याचे कागदपत्र नोंदणीकृत करण्यासाठी ‘स्टँप ड्युटी’ भरण्याच्या नावावर रोहित माडेवारने दिनेश यांच्याकडून १४ लाख ८ हजार रुपये रोख घेतले. त्यानंतर काहीच दिवसात त्याने दिनेश मारशेट्टीवार यांना कर्ज मंजूर झाल्याची बतावणी केली. त्यासाठी त्याने तीन धनादेशाचे फोटो आणि बनावट कर्ज मंजुरीचे मूळपत्र दिनेश यांना दिले. या बनावट दस्तावेजाला खरे समजून दिनेश यांनी मालमत्तेचे विक्रीपत्र लावले.

त्यात तीन बनावट धनादेशही जोडले. सर्व कागदपत्रे बँकेत जमा केल्यावर बॅंकेद्वारे ही कागदपत्रे बनावट असल्याचे सांगून त्यांना कर्ज देण्यास नकार दिला. फसवणूक झाल्याचे निदर्शनास आल्याने त्यांनी मालमत्तेचे विक्रीपत्र रद्द केले. मात्र, हे सर्व करताना त्यांना स्टँम्प ड्युटीवर ३२ लाख ४ हजार रुपयांचा खर्च लागला. त्यामुळे रोख रक्कम आणि स्टॅम्प ड्युटीवर लागलेल्या खर्च असे एकूण ४६ लाख १२ हजार रुपयांची आरोपी रोहित माडेवार याने फसवणूक केल्याचे निष्पन्न झाले. त्यातून त्यांनी बजाजनगर पोलिसांकडे तक्रार दाखल केली.