नागपूर : सर्वसामान्यांना त्यांच्या हक्काचे घर मिळालेले आहे. त्यांच्या स्वप्नातील घर उपलब्ध करून देण्यासाठी शासन कटिबद्ध असल्याचे प्रतिपादन पालकमंत्री डॉ. नितीन राऊत यांनी सोमवारी केले. नागपूर महानगर प्रदेश विकास प्राधिकरणामार्फत बांधलेल्या पंतप्रधान आवास योजनेतील २ हजार ९८० घरकुलांची सोडत पालकमंत्री यांच्या उपस्थितीत काढण्यात आली.

प्रधानमंत्री आवास योजना प्रकल्प हा केंद्र व राज्य शासनाचा महत्त्वाकांक्षी प्रकल्प आहे. केंद्रीय मंत्री नितीन गडकरी यांच्या अध्यक्षतेखाली १८ ऑगस्ट २०१९ रोजी एकूण ४ हजार ३४५ घरकुलांपैकी ४ हजार १७२ घरकुलांची सोडत काढली होती. एकूण ४ हजार ३४५ घरकुलांपैकी २ हजार ९८० घरकुलांची सोडत आज करण्यात आली.

नागपूरसारख्या महानगरामध्ये घरांचे स्वप्न साकार करणे हे सोपे नाही. वाढलेल्या जमिनीच्या किमती, घरांच्या बांधकामासाठी आवश्यक असलेल्या साहित्याच्या किमतीमध्ये वाढ झाल्याने सर्वसामान्यांना शहरात घर बांधणे व स्वतःच्या घरात राहण्याची संधी फार कष्टाने मिळते. प्रत्येकाला स्वत:च्या हक्काचे घर मिळावे यासाठी शासन प्रयत्नशील आहे, असे नितीन राऊत म्हणाले.

केंद्र शासनाच्या पंतप्रधान आवास योजनेमुळे सर्वसामान्यांना घरकुले मिळाली आहेत. या योजनेंतर्गत शहरात वाठोडा तरोडी (खुर्द) व वांजरी या भागात घरकुल बांधण्याचे प्रकल्प सुरू करून जवळपास ४ हजार ३४५ घरकुल बांधून तयार झालेली आहेत. म्हणजे एवढ्या लोकांना हक्काचे घर लवकरच मिळणार आहेत. लोकांनी घरकुलांची सारी रक्कम भरल्याने घरकुलाचा ताबाही मिळाला आहे. उरलेल्या जवळपास तीन हजार घरकुलांची सोडत झालेली आहे. शहराच्या विकासासाठी ही बाब महत्त्वाची असल्याचे नितीन राऊत म्हणाले.

अधिकाऱ्यांनी जातीने लक्ष द्यावे

पंतप्रधान आवास योजनेअंतर्गत घरकुल वाटपाचा दुसरा टप्पा लवकरच विकसित करण्यात येणार आहे. एन.एम.आर.डी.ए.च्या योजनांना पालकमंत्री या नात्याने सहकार्य करील. सर्वसामान्य माणूस आपल्या आयुष्याची पुंजी घर बांधण्यासाठी लावतो. त्यामुळे या योजनेअंतर्गत घरांचे बांधकाम उत्कृष्ट दर्जाचे राहील, याकडे एन.एम.आर.डी.ए.च्या अधिकाऱ्यांनी जातीने लक्ष द्यावे, असेही डॉ. नितीन राऊत म्हणाले.