नागपूर : जागतिक कमॉडिटी बाजारात तेलबिया आणि खाद्य तेलाच्या किंमतीत घसरण झाल्याने देशांतर्गत बाजारात खाद्य तेलाचे भावात घसरण होण्यास सुरुवात झाली आहे. गेल्या एका वर्षात खाद्य तेलाच्या दरात तब्बल दुप्पटीने वाढ झालेली आहे. ही घट दिलासा देणारी असली तरी ग्राहकांच्या खिसा हलका करणारीच आहे. खाद्य तेल उत्पादकांनी पामतेल, सोयाबीन आणि सूर्यफुलाच्या तेलाची किंमत प्रतिकिलो दोन रुपयांनी कमी केले आहे. पावसाने दडी दिल्यामुळे मुग मोगर, उडीद, तूर डाळ, तांदळाच्या दरातही प्रति क्लिंटल १०० ते १५० रुपयांची वाढ झालेली आहे. (Edible Oil Price Updates)

इंडोनेशियाने पामतेल निर्यात करण्याची बंदी मागे घेतल्यानंतर देशात सुमारे दोन लाख टन कच्चे पामतेल भारतात पाठवण्यात आले आहे. भारतात पामतेलाची उपलब्धता वाढलेली आहे. त्यामुळे इतर खाद्यतेलांच्या किमतीत किंचित घसरण झाली आहे. गेल्या पाऊण महिन्यात दिवसात सोयाबीन तेल प्रतिकिलो सात ते आठ रुपयांनी घटले आहे. २० जूनपर्यंत किरकोळ बाजारात पामतेल उपलब्ध होणार आहे. त्यामुळेच तेलाच्या दरात घट झाली आहे. गेल्या पाऊण महिन्यात १५ किलो सोयाबिनचा डब्बा २८०० रुपये होता तो आता २५०० रुपयावर आला आहे. त्याचा लाभ थोड्याफार प्रमाणात ग्राहकांना मिळत आहे, नागपूर किरकोळ बाजार संघाचे अध्यक्ष प्रभाकर देशमुख यांनी सांगितले.

आंतरराष्ट्रीय बाजारात खाद्य तेलाच्या किंमती कमी झाल्या आहेत. त्यामुळे कंपन्यांनी दर कपात केली आहे. या निर्णयाने पामतेलाचा भाव ७ ते ८ रुपयांनी कमी झाला आहे. सूर्यफूल तेलाचा भाव १० ते १५ रुपयांनी आणि सोयाबीन तेल सात रुपयांनी स्वस्त झाले आहे.

शाळा सुरु झाल्याने किराणा बाजारातील वर्दळ कमी झालेली आहे. परिणामी, बाजारात शांतता आहे. उन्हाळ्याच्या काळात गहू, डाळीची खरेदीला चांगले दिवस असतात, आता शाळा सुरु झाल्याने पुस्तके, शाळेचा पोषाख आणि शैक्षणिक साहित्य खरेदीवर ग्राहकांचा भर आहे असे किराणा व्यापारी अनिल नागपाल यांनी सांगितले. केंद्र सरकारने साखर निर्यातीवर निर्बंध आणल्याने साखरेचे भाव स्थिरावलेले आहेत. तसेच पावसाने दडी दिल्यामुळे किराणा धान्याचे दर वाढू लागले आहे. गव्हाचे भाव स्थिरावलेले आहेत असे डी.बी.मार्टचे आदर्श देशमुख यांनी सांगितले.