वाडी ( जि.नागपूर) : मंगळवारी झालेल्या नगर परिषदेच्या सभेत गरीब कुटुंबांना मजीप्राचे 7 हजार रुपये नळजोडणीसाठी खर्च करणे अवघड होणार असल्याची तक्रार लक्षात घेता नगर परिषद निधीतून हा खर्च करण्याचा प्रस्ताव चर्चा झाल्यानंतर पारित करण्यात आला. त्यामुळे या निर्णयाचे परिसरात स्वागत करण्यात येत आहे. 

क्‍लिक करा : गृहमंत्र्यांचा मंत्र, आता विकासकामाला लागूया ! 

वाडी नगरपरिषदेच्या सभेत घेतला निर्णय 
मागील आठवड्यात आंबेडकरनगर वाडीचे नगरसेवक आशीष नंदागवळी यांनी उपोषण आंदोलन करून परिसरातील गरीब, मजूर नागरिकांनाही मजीप्राने ग्राहकांप्रमाणे निःशुल्क नळजोडणी प्रदान करावी व वाडीतील अनेक ग्राहकांना मजीप्राने रीडिंग न घेता अधिक शुल्क लावून दिलेले बिल परत घ्यावे आदी मागण्या केल्या. या उपोषण आंदोलन मंडपाला नगराध्यक्ष प्रेम झाडे यांनी भेट देऊन समस्या समजून घेतली. यासंदर्भात योग्य कारवाईचे आश्वासनही दिले होते. शेवटी उपाध्यक्ष राजेश थोराणे, नगरसेवक श्‍याम मंडपे, नरेंद्र मेंढे यांच्या उपस्थितीत उपोषण स्थगित करण्यात आले. याच विषयावर सोमवारी नगराध्यक्ष प्रेम झाडे यांनी इतर सहकारी नगरसेवकांसोबत चर्चा करून या आकस्मिक सभेचे नियमानुसार आयोजन करण्यात आल्याची माहिती दिली. सोमवारी प्रेम झाडे यांच्या अध्यक्षतेत आयोजित बैठकीत मुख्याधिकारी जुम्मा प्यारेवाले, उपाध्यक्ष राजेश थोराणे, राष्ट्रवादीचे नगरसेवक राजेश जयस्वाल, श्‍याम मंडपे, बसपचे नरेंद्र मेंढे, अस्मिता मेश्राम, आशीष नंदागवळी, भाजपचे केशव बांदरे, नरेश चरडे आदींच्या उपस्थितीत सभा झाली. 

क्‍लिक करा : दोघांचा अपघाती मृत्यू, खुमारीवासींचे "रस्ताजाम' 

आंदोलनर्त्यांत समाधान
या सभेत मजीप्रा अधिकाऱ्यांचे सरकारी पत्रक व शुल्क निश्‍चितीनुसार ग्राहकांना शुल्कात सूट दिली जाऊ शकत नसल्याचे पत्र नगराध्यक्षांना सोपविले. यामुळे गरीब कुटुंबांना मजीप्राचे 7 हजार रुपये नळजोडणीसाठी खर्च करणे अवघड होणार असल्याची तक्रार पाहता नगर परिषद निधीतून हा खर्च करण्याचा प्रस्ताव चर्चा झाल्यानंतर पारित करण्यात आला. प्रथम चरणात दलित वसाहतीत राहणाऱ्या गरीब व शासनाच्या योजनेचा लाभ घेणाऱ्या ग्राहकांना या योजनेचा लाभ देण्याचे मान्य करण्यात आल्याची माहिती नगराध्यक्ष प्रेम झाडे यांनी दिली .