नागपूर : लॉकडाउनमुळे आर्थिक अडचणीत सापडलेली नागपूरची आंतरराष्ट्रीय धावपटू ज्योती चौहान हिला मदतीचा ओघ सुरूच आहे आतापर्यंत अनेक जणांनी तिला वस्तू व रोख स्वरूपात भरीव मदत करून सामाजिक बांधिलकीचा परिचय दिला आहे. 
ज्योतीच्या दयनीय स्थितीबद्दल दैनिक 'सकाळ'ने शनिवारच्या अंकात वृत्त प्रकाशित केल्यानंतर तिच्या मदतीसाठी असंख्य हात पुढे सरसावले.

काल मनपाचे क्रीडाधिकारी पीयूष आंबूलकर यांनी ज्योतीच्या परिवाराला महिनाभर पुरेल इतका किराणा व अन्नधान्य दिल्यानंतर मुंबईचे राजेश पुल्लवार यांनीही तिला आहारासाठी चार हजार रुपये, विद्युत विभागात कार्यरत सुधीर मोहिते यांनी अडीच हजार रुपये, उपजिल्हाधिकारी दिनेश भागवतकर यांनी 2100 रुपये, अतुल खेडेकर यांनी दोन हजार व मधुलिका ग्रुपच्या सदस्यांनी एक हजार रुपयांची मदत केली होती. आजही अनेकांनी ज्योतीला धान्य व पैशाच्या स्वरूपात मदत केली. असोसिएशन ऑफ प्रोग्रेसिव्ह एम्प्लॉइज ग्रुपचे नरेंद्र सूर्यवंशी, डॉ. विलास तेलगोटे व मनोज शेंडे यांनी अन्नधान्याची किट व चार हजार रुपये दिले. याशिवाय असोसिएशनतर्फे तिच्या परिवाराला वर्षभर दर महिन्याला एक हजार रुपयांचीही मदत केली जाणार आहे.

अधिक वाचा : शाळा बंद, अभ्यास सुरू! सुट्यांमध्ये विद्यार्थ्यांना टेन्शन

तसेच हिंगणा, एमआयडीसी पोलिस ठाण्याचे ठाणेदार हेमंतकुमार खराबे यांनीसुद्धा ज्योतीच्या घरी अन्नधान्याच्या दोन किट व रोख पाच हजार रुपयांची मदत पाठविली. तसेच कमल कुंदन यांनीही पाच हजार रुपये, नेमबाज अनिल पांडे यांनी चार हजार रुपये आणि जयंत काटदरे यांनी दोन हजार रुपयांची मदत केली. याशिवाय सुनीलकुमार, भावेश कारेकर, राकेश अजाने, सत्या करकेरा, स्वप्नील शिंदे, सचिन सहाने, मानसी वानगीकर, प्रशांत देवरे, संतोष दळवी, हितेश मिरलेकर, श्रीकांत बिजुर, श्री घार्गे यांनीही माझ्या बॅंक खात्यात पैसे टाकल्याचे ज्योतीने सांगितले.