Nagpur : पारडी पोलिस ठाण्याच्या हद्दीतील जबलपूर-हैदराबाद महामार्गावर ‘हिट अँड रन’ प्रकरणात ३० वर्षीय युवकाला ट्रेलरने धडक दिल्याने त्याचा मृत्यू झाला. ही घटना ३१ जुलैला सांयकाळी पावणे सात वाजताच्या सुमारास उघडकीस आली.

अर्जुन गायकवाड (वय ३० रा. पिपरी, कन्हान) असे मृत युवकाचे नाव आहे. पोलिसांनी दिलेल्या माहितीनुसार, अर्जुन हा कन्हानच्या रामनगर येथील रहिवासी आहे. तो मित्र अमित चौरे (वय ३०) यांच्यासोबत कामावर ये-जा करतो.

बुधवारी सायंकाळी दोघेही मोटारसायकलवर (एमएच ३१एटी२६९६) घराकडे येत असताना, त्यांच्या मोटारसायकलला मागून ट्रेलरने धडक देत पळून गेला. यात अर्जुन आणि अमित दोघेही गंभीर जखमी झाले. त्यांना जवळच्या रुग्णालयात दाखल करण्यात आले. उपचारादरम्यान अर्जुनचा मृत्यू झाला, तर अमितवर उपचार सुरू आहेत. याप्रकरणी पारडी पोलिसांनी गुन्हा दाखल करीत आरोपीच ट्रेलरचालकाचा शोध सुरू केला आहे.