टेकाडी (जि.नागपूर)  : तंबाखू आरोग्यास हानिकारक आहे. तंबाखूने कर्करोगाचाही धोका आहे, अशा दर्शनी भागात मोठ्या अक्षरात सूचना देउनही मात्र अनेकांसाठी "शौक बडी चीज है' याचा प्रत्यय येतो. संचारबंदीच्या काळात तंबाखूला मोठी मागणी आहे. त्याचा गैरफायदा काही दुकानदारांनी चांगलाच घेतला आहे. लॉकडाउनमुळे पानटपऱ्या बंद असल्यानेदेखील तंबाखू आणि सुपारीचे ब्लॅक मार्केटिंग करणाऱ्यांनी चांगलीच माया जमवायला सुरुवात केली आहे.

सविस्तर वाचा : तळीरामांना अजून पहावी लागणार वाट; उत्साहावर पडले विरजण

तंबाखूच्या पुडीला चांगलाच भाव
तंबाखू, खर्रा, सिगारेट आणि दारू ब्लॅकमध्ये उपलब्ध जरी होत असले तरी अनेक शौकिनांना "शौक काफी मेहंगी चीज है' म्हणायची वेळ आलेली आहे. संचारबंदीत ठोक बाजारात तंबाखूचा भाव वाढला असल्याचे कारण सांगून किरकोळमध्ये तंबाखूपुडीची चढ्या दराने विक्री सुरू आहे. कोरोनाच्या पार्श्वभूमीवर फक्त जीवनावश्‍यक वस्तू व आरोग्यसेवा मिळवण्याचीच मुभा शासनाने दिलेली आहे. किराणा दुकानातील तंबाखूचा साठा संपलेला असल्याने तंबाखू सुपारीचा काळाबाजार सुरू झाला आहे. लॉकडाउनपूर्वी 10 रुपयाला मिळणारी तंबाखूच्या पुडीची किरकोळ विक्रीच 20 ते 25 रुपयांवर गेली आहे. खर्ऱ्यानेदेखील उच्चांक गाठत 10 ते 20 रुपयांपासून 35 ते 45 पर्यंत आपला भाव नेलेला आहे. देशी-विदेशीची जागा गावठी दारूने शंभर रुपये ग्लास, 500 रुपये बिसलेरी बॉटलने घेतलेली आहे.

सविस्तर वाचा  : दमाग्रस्तांना कोरोना संसर्गाची जोखीम; अशी घ्या काळजी

भांगाच्या गोळ्यांची दुकानांमध्ये मागणी
तंबाखू जीवनावश्‍यक वस्तूंमध्ये येत नसल्याने त्याची अधिकृत वाहतूक सुरू नसल्याने तंबाखूचे व्यसन जडलेल्यांचे हाल होत आहेत. अनेकांकडून छुप्या मार्गाने आलेला माल उपलब्ध करून दिला जातो. त्याकडे संबंधित विभागाची नजर नसल्याचे चित्र आहे. दारू आणि इतर पदार्थ उपलब्ध होत नसल्याने कन्हान पोलिस ठाण्याच्या हद्दीतील काही गावातील दुकानांमध्ये भांग ग्राहकांसाठी उपलब्ध करून दिली जात आहे. कुठे गांजाच्या पुड्या उपलब्ध होत असल्याने वयस्क तर तरुणाईदेखील गांजा आणि भांगने आपली "तलब' लॉकडाउनपर्यंत भागवू, असा विचार करत आहे. मात्र, हे व्यसन करणाऱ्यांना भविष्यात मोठी किंमत मोजावी लागू शकते तर विकणाऱ्यांनी माणुसकी गहाण ठेवल्याचे चित्र आहे.