भिवापूर (जि. नागपूर) : कोलारी नजीकच्या नाल्याच्या काठावरील झुडपात मानवी कवटी (Human Skull found in a bush) आढळून आल्याने परिसरात खळबळ उडाली आहे. या घटनेच्या तीन दिवसांपूर्वी याच परिसरात महिलेची साडी व इतर वस्त्र आढळून आले होते. कवटी व कपडे हे पाच महिन्यांपासून बेपत्ता असलेल्या कोलारी येथील ३२ वर्षीय विधवा महिलेचे असावे, असा संशय व्यक्त करण्यात येत आहे. पोलिसांचा त्या दिशेने तपास सुरू आहे.

कोलारी येथील शेतकरी भालचंद्र धनविजे सकाळी शेतावर जात असताना पंढरी वैरागडे यांच्या शेताजवळील नाल्याच्या काठावर त्यांना मानवी कवटी दिसून आली. पोलिसांना माहिती मिळताच ठाणेदार महेश भोरटेकर यांच्या नेतृत्वात परिसराची पाहणी करण्यात आली. पंचनाम्यानंतर कवटी ताब्यात घेऊन फाँरेंसिक चाचणीसाठी नागपूरला पाठविण्यात आली. या घटनेच्या तीन दिवसांपूर्वी बुधवारी (ता. १६) याच परिसरात महिलेची साडी व इतर वस्त्रे आढळून आले होते. या कपड्यांच्या बाजूला जनावराचे मुंडके व हाडे पडलेली होती. आता मानवी कवटी आढळून आल्याने ती महिलेचीच असावी असा कयास वर्तविण्यात येत आहे.

प्रमिला अचानक झाली होती बेपत्ता

कोलारी येथील प्रमिला मारोती धनविजे (वय ३२) ही विधवा महिला १ ऑक्टोंबर २०२१ पासून बेपत्ता आहे. तिचा भाऊ रवींद्र शेंडे याने ९ ऑक्टोबर २०२१ ला दिलेल्या तक्रारीवरून भिवापूर पोलिसांत ती हरविल्याची तक्रार नोंदविली होती. तेव्हापासून पोलिस तिचा शोध घेत आहेत. बेवारस स्थितीत आढळून आलेले कपडे व मानवी कवटी (Human Skull found in a bush) ही बेपत्ता महिलेचीच असावी, असा संशय व्यक्त केला जात आहे. अचानक ती बेपत्ता झाली व पाच महिन्यांनंतर गावाजवळच मानवी कवटी व कपडे आढळून आल्याने महिलेची हत्या केल्याचा संशय बळावला आहे.