नागपूर : पत्नीच्या चारित्र्यावर शंका घेत, तिच्या डोक्यावर वार करीत खून केल्याची घटना कपिलनगर पोलिस ठाण्याच्या (Kapil Nagar Police Station) हद्दीत असलेल्या दीक्षित नगरतील (Dixit Nagar) पंचमवैद्य आर्य सोसायटीत मंगळवारी (ता. २५) रात्री साडेनऊच्या सुमारास उघडकीस आली. याप्रकरणी पोलिसांनी आरोपी पतीस अटक केली.

मन्नत ऊर्फ मिनू कौर विर्क (वय २४) असे पत्नीचे नाव असून दिलप्रित उर्फ विक्की कुलविंदरसिंग विर्क (वय ३०) असे अटक करण्यात आलेल्या पतीचे नाव आहे. पोलिसांनी दिलेल्या माहितीनुसार, मन्नत आणि दिलप्रित यांचे २०२२ ला लग्न झाले. दिलप्रित याचे स्पेअर पार्टचे दुकान आहे. त्याने तिला सदर येथे एका मित्रासोबत पाहिले होते. तेव्हापासून तो सातत्याने तिच्या चारित्र्यावर शंका घेत होता.

विशेष म्हणजे, त्याने मन्नतचा भाऊ विशाल प्रकाश हरजानी (वय २०, हुडको कॉलोनी, जरीपटका) याला तिला सोडचिठ्ठी देण्याबाबत बैठकीला बोलाविले होते. दरम्यान, विशालने मन्नत आणि दिलप्रित यांना फोन केला. मात्र, दोघांनीही फोन न उचलल्याने त्याला शंका आली. त्याने पोलिसांना याबाबत सूचना देत, घर गाठले.

मात्र, दाराला लॉक असल्याने त्यांनी दार तोडून आत प्रवेश केला असता, मन्नतच्या डोक्यावर प्रहार केल्याने ती रक्ताच्या थारोळ्यात पडलेली दिसून आली. पोलिसांनी तिला उपचारासाठी मेयो रुग्णालयात नेले असता, डॉक्टरांनी तपासून तिला मृत घोषित केले. याप्रकरणी विशालच्या तक्रारीवरून पोलिसांनी गुन्हा दाखल करीत, दिलप्रितचा शोध सुरू केला. दरम्यान, त्याला पोलिसांनी नवीन कामठी परिसरातून ताब्यात घेतले. त्याने खुनाची कबुली दिली.