नागपूर : शहरात १५ ते १८ वयोगटातील विद्यार्थ्यांसाठी लसीकरण(students vaccination) सुरू होऊन चार दिवस झाले असून ३५ हजारांवर तरुणांनी लसीचा पहिला डोस घेतला. लसीकरणासाठी पात्र एकूण विद्यार्थ्यांपैकी २७.५ टक्के विद्यार्थ्यांनी लस घेतली. एकूणच तरुणाईमध्ये लसीकरणाबाबत उत्साह दिसून येत आहे. दररोज दहा हजारांवर विद्यार्थी ऑनलाइन नोंदणी करीत आहेत. केंद्र सरकारने(central government) १०० टक्के लसीकरणावर भर दिला असून १५ ते १८ वयोगटातील विद्यार्थ्यांचे लसीकरण करण्याच्या सूचना केल्या आहे. त्यानुसार नागपुरात ३ जानेवारीपासून या वयोगटासाठी लसीकरण सुरू करण्यात आले.

पहिल्याच दिवशी ६ हजार ८३८ विद्यार्थ्यांनी लसीकरण करीत उत्स्फूर्त प्रतिसाद दिला. विद्यार्थ्यांचा हा प्रतिसाद कायम असून दररोज लसवंत विद्यार्थ्यांची संख्या वाढत आहे. पहिल्या दिवशी दहा हजारांवर विद्यार्थ्यांनी ऑनलाइन नोंदणी केली होती. पहिल्या दिवशी १९ केंद्र व ३३ शाळांमधून लसीकरण करण्यात आले. गेल्या चार दिवसांत ३५ हजार ७३२ विद्यार्थ्यांचे लसीकरण झाले. शहरात एकूण १ लाख ३० हजार विद्यार्थी लसीकरणासाठी पात्र आहे. अर्थात चार दिवसांत २७.५० टक्के विद्यार्थ्यांनी लस घेतल्याचे दिसून आले. सर्दी, खोकला असलेल्या विद्यार्थ्यांना परत पाठविण्यात येत आहे. अन्यथा ही टक्केवारी आणखी वाढली असती, असे महापालिकेतील अधिकाऱ्यांनी नमुद केले. लसीकरणासाठी ऑनलाइन किंवा ऑफलाइन नोंदणी बंधनकारक आहे. शैक्षणिक संस्थांमधील केंद्रांवर ऑनलाइन नोंदणीची गरज नाही.

१५ जानेवारीपर्यंत ‘डेडलाइन’

शहरात १ लाख ३० हजार विद्यार्थी लसीकरणासाठी पात्र आहे. लसीकरणाचा वेग बघता येत्या चार ते पाच दिवसांत पात्र सर्व विद्यार्थी लसवंत होतील. परंतु १५ जानेवारीपर्यंत सर्व विद्यार्थ्यांचे लसीकरणाचे लक्ष्य महापालिकेने ठेवले आहे.