नागपूर : तंत्रज्ञान अन्‌ तंत्रज्ञानाच्या या युगात आपण अकराच्या पुढील पाढे म्हणू शकत नाही. आप्तांचा मोबाईल क्रमांक शोधण्यासाठी आपण मोबाईलची मदत घेतो. इतकी आपली स्मरणशक्ती कमकुवत झाली आहे. मग, या युगात केवळ राष्ट्रध्वज पाहत शंभर देशांची नावे, त्यांच्या राजधान्या पाच मिनिटांमध्ये कोणी ओळखू शकेल, यावर आपला विश्‍वास बसेल का. पण होय, ही बाब खरी आहे. नागपूरकर युवेन डाऊ याने ही किमया साध्य केली ती वयाच्या चवथ्या वर्षी. त्याच्या या अद्‍भूत कौशल्याची नोंद इंटरनॅशनल बुक ऑफ रेकॉर्डने घेतली आहे.

युवेन हा शास्त्रीनगर येथील रहिवासी. त्याचे आई-वडील सायली व केतन दोघेही अभियंता असून सध्या कॅनडा येथील टोरंटोमध्ये ते नोकरी निमित्त वास्तव्यास आहे. युवेन तीन वर्षांचा झाल्यानंतर तो काही देशांचे राष्ट्रध्वज पाहून त्या देशांचे नावे ओळखू शकतो, ही बाब सायली व केतन यांच्या लक्षात आली. त्या दिवसापासून खेळासोबत अभ्यास म्हणून दररोज विविध देशांचे राष्ट्रध्वज युवेनला दाखविणे पालकांनी सुरू केले.

दररोज केवळ एक खेळ म्हणून एक ते दीड तास याचा सराव सुरू असायचा. अकरा महिन्यानंतर युवेन शंभरपेक्षा जास्त देशांची नावे राजधानीसकट ओळखू लागला. तीन वर्षे अकरा महिन्यांचा झाल्यानंतर आई-वडिलांना हा विक्रम करू शकतो, याची खात्री झाली. पाच एप्रिल रोजी त्यांनी त्यासाठी प्रयत्न केले. युवेनने पाच मिनिटे ४३ सेकंदात शंभर देशांची आणि त्यांच्या राजधान्यांची नावे ओळखून दाखविली आणि या अशक्यप्राय वाटणाऱ्या जागतिक विक्रमाची नोंद झाली. इंटरनॅशनल बुक ऑफ रेकॉर्डतर्फे या विक्रमाची नोंद घेण्यात आली असून युवेनला नुकतेच प्रमाणपत्र प्रदान करण्यात आले आहे.