नागपूर : निधी कमी मिळण्यासोबतच कामे होत नसल्याने सत्ताधारी पक्षातील सदस्यांमध्ये नाराजी आहे. शिवाय पदाधिकाऱ्यांच्या कारभारावर काही सदस्य असमाधानी आहेत. त्यामुळे २० तारखेच्या सर्वसाधारण सभेत याचा स्फोट होण्याची भीती सत्ताधाऱ्यांना आहे. हे टाळण्यासाठी पदाधिकाऱ्यांकडून प्रयत्न होत असल्याचे सांगण्यात येते.

जिल्हा परिषदेची सर्वसाधारण सभा शुक्रवारी (२० ऑगस्ट) ऑनलाइन माध्यमातून होणार आहे. सभेच्या पार्श्वभूमीवर अध्यक्षांच्या कक्षात बैठक झाली. सूत्रांकडून मिळालेल्या माहितीनुसार, बैठकीला सर्व सभापतींसह काही प्रमुख सदस्य उपस्थित होते. काही महिन्यांपासून सत्ताधारी पक्षातील काही सदस्य पदाधिकाऱ्यांच्या कारभारावर नाराज आहेत. नुकत्याच एक घटनेवरून त्यांच्यातील गटबाजी उघडपणे समोर आली. विरोध पक्षातील काही सदस्यांना झुकते माप देण्यात येत आहे. त्यांनाच विविध योजनेत अधिक निधी देण्यात येत आहे तर सत्ताधारी सदस्यांना कमी मिळत आहे. दलित वस्ती निधी वाटपात असाच प्रकार झाल्याचे सांगण्यात येते.

जनसुविधा, नागरी सुविधा निधी वाटपावरही सदस्यांमध्ये नाराजी आहे. निधी वाटपात समानता नसल्याचा मुद्दा स्थायी समितीतही गाजला होता. पदाधिकाऱ्यांच्या कारभारावर असलेल्या नाराजीचा ‘ब्लास्ट’ सर्वसाधारण सभेत होण्याची चर्चा आहे. तसे झाल्यास पदाधिकाऱ्यांची अडचण होणार आहे. हे टाळण्यासाठी पदाधिकाऱ्यांकडून सावधगिरीचे पावले उचलण्यात येत असल्याचे सांगण्यात येते. नुकतेच जिल्हा परिषदेत सुरक्षा ठेव घोटाळा समोर आला. या प्रकरणात खुद्द मंत्री सुनील केदार यांनी लक्ष घातले असताना सारवासारव होत असल्याची चर्चा आहे.

विरोधकांमध्ये फूट!

एकमत नसल्याने अडचण होणार असल्याचे लक्षात येताच सत्ताधाऱ्यांनी विरोधकांमध्ये फूट पाडून त्यांच्यातील काही सदस्यांना हाताशी धरल्याचे चर्चा आहे. त्यामुळे सभा फारशी गाजणार नसल्याचेही सांगण्यात येते.