हिंगणा : तालुक्यातील मिनी मंत्रालय म्हणून ओळखल्या जाणाऱ्या पंचायत समितीतील बांधकाम विभागात ‘रात्रीस खेळ चाले’ हा प्रकार सुरू असतानाच याच विभागाच्या मागील परिसरात ब्रांडेड महागड्या दारूच्या बाटल्यांचा खच दिसून आला आहे. यामुळे पंचायत समिती कार्यालयाच्या मागील परिसरात कार्यालय बंद झाल्यानंतर दारूचे पेग कोण रिचवितो? हा प्रश्न निर्माण झाला आहे.

हिंगणा पंचायत समिती कार्यालयातील बांधकाम विभागातील अभियंता व कर्मचारी सायंकाळी सहा वाजता नंतर कार्यालयात येतात. यानंतर हा विभाग रात्री उशिरापर्यंत सुरू राहतो. या ठिकाणी मर्जीतील विशिष्ट लोकांना कामे केली जात असल्याची चर्चा आहे. रात्री उशिरापर्यंत हा विभाग सुरू राहत असल्याने नेमके या विभागात रात्री उशिरापर्यंत अशी कोणती विशिष्ट कामे केली जातात, हा प्रश्नही निर्माण झाला आहे. बांधकाम विभागाच्या मागील परिसरात विदेशी दारूच्या ब्रँडेड बाटल्यांचा खच मोठ्या प्रमाणात पडून आहे.

रात्री उशिरापर्यंत हा विभाग सुरू राहत असल्याने येथे नेमके कोणती लोकं कामासाठी येतात हा प्रश्नही उपस्थित होत आहे. मग महागडे दारूचे ब्रँड घेऊन या कार्यालयात नेमके लोक कोणासाठी येतात,याबाबतही तर्क वितर्क सुरू झाला आहे.

पंचायत समितीच्या मागील परिसरात असलेल्या आवारात रात्रीच्या वेळी दारूचा अड्डाच भरतो का? असा संभ्रमही आता निर्माण झाला आहे.तालुक्यातील मिनी मंत्रालय म्हणून पंचायत समितीची ओळख आहे. या विभागात शाखा अभियंता, कनिष्ठ अभियंता, लिपिक,कर्मचारी आणि एक कंत्राटी कर्मचारी असे पाच कर्मचारी कार्यरत आहेत. बांधकाम विभागाच्या अगदी मागील परिसरातच दारू आणून पिण्याचा प्रकार सुरू असेल तर खंड विकास अधिकाऱ्याच्या पाठीमागे हा प्रकार सुरू आहे का? याचीही चौकशी होणे गरजेचे आहे.

पंचायत समिती प्रशासनाची प्रतिमा तालुक्यात चांगली आहे. मात्र या प्रकारामुळे प्रशासनाची प्रतिमा मलिन होत आहे. हा या प्रकारावर तातडीने आळा बसविणे गरजेचे आहे. यासाठी खंड विकास अधिकारी आता काय भूमिका घेतात, याकडे सर्व जनतेचे लक्ष लागले आहे.