नागपूर : कोरोना रुग्णांचा आकडा दिवसेंदिवस वाढतो आहे. परिणामी प्रशासन आणि शासन दोघांचीही चिंता वाढते आहे. त्याच पार्श्‍वभूमीवर महापौश्र संदीप जोशी यांनी जनजागृतीसाठी बाजारपेठेचा दौरा केला.

त्यावेळी कोरोनाचा प्रसार रोखण्यासाठी केलेल्या आवाहनाला व्यापारी व नागरिकांकडून प्रतिसाद मिळत नसल्याची खंत व्यक्त करीत बेजबाबदार वागणुकीमुळे पुन्हा लॉकडाऊन करण्यात येईल, असा इशारा महापौर संदीप जोशी यांनी आज दिला. दुकानदारांकडून सम आणि विषम तारखांचे पालन न करणे, मास्कचा वापर न करणे, दुकानांमध्ये होणाऱ्या गर्दीबाबत महापौरांनी दुकानदारांवर संताप व्यक्त केला. यावेळी दोन दुकानदारांवर दंडात्मक कारवाईही करण्यात आली.

जनजागृतीसाठी महापौर जोशी यांनी मंगळवारी धरमपेठ झोनअंतर्गत बाजाराचा दौरा केला. यावेळी त्यांच्या सोबत धरमपेठ झोन सभापती अमर बागडे, नगरसेवक सुनील हिरणवार, नगरसेवक प्रमोद कौरती, सहायक आयुक्त प्रकाश वराडे, अंबाझरी पोलिस स्टेशनचे वरिष्ठ पोलिस निरीक्षक विजय करे, व्यापारी आघाडीचे तुषार कोठारी, अजय शर्मा, गोपाल बावनकुळे, सागर जाधव, विजय डोंगरे, योगेश पाचपोर, मनोज पोद्दार आदी उपस्थित होते.

शंकरनगर चौक, वेस्ट हायकोर्ट रोड, लक्ष्मीभूवन चौक, गोकूलपेठ बाजार, रामनगर परिसर या संपूर्ण भागात फिरून महापौर संदीप जोशी यांनी कोरोनासंदर्भात शासनाने दिलेल्या दिशानिर्देशांचे पालन करण्याचे आवाहन केले. दुकानांसंदर्भात सम आणि विषम तारखांच्यांच्या नियमांचे पालन करणे, मास्क वापरणे, फिजिकल डिस्टन्सिंगचे पालन करण्याचेही आवाहन यावेळी करण्यात आले. प्रत्येकाने स्वत:सह इतरांच्या आरोग्याचा विचार करून नियमांचे पालन करावे, अन्यथा लॉकडाउनला सामोरे जावे, असा इशारा महापौरांनी दिला.

सविस्तर वाचा - 'अपयशातच दडलाय यशाचा पासवर्ड'..असे का म्हणताहेत यवतमाळ जिल्हा परिषदेचे नवे सीईओ ..वाचा सविस्तर 

दोन दुकानांना प्रत्येकी पाच हजारांचा दंड
लक्ष्मीभूवन चौकातील एका ज्वेलर्समध्ये फिजिकल डिस्टन्सिंगचे पालन होत नसल्याचे दिसून येताच महापौर जोशी यांनी मालकाकडून पाच हजार रुपये दंड वसूल करण्याचे निर्देश उपद्रव शोध पथकाला दिले. याशिवाय गोकुलपेठ ते राम नगर मार्गावरील दुकानांच्या ओळीत सम व विषम तारखांचे उल्लंघन करून तसेच फुटपाथवर अतिक्रमण करणाऱ्या एका दुकानदाराकडून पाच हजार रुपये दंड वसूल करण्यात आला.

संपादन - स्वाती हुद्दार