नागपूर : कोरोनाकाळातही (Corona) पदव्युत्तर अभ्यासक्रमाच्या परीक्षा महाविद्यालयस्तरावर घेण्याचे आदेश विद्यापीठाने (Nagpur University) देत, आजपासून परीक्षा सुरू केल्या. याची परिणिती म्हणजे परीक्षेचे टेन्शन घेत एका कोरोनाबाधित एम.टेक (M.Tech).च्या विद्यार्थिनीला अतिदक्षता (आयसीयू) (ICU) वॉर्डातून परीक्षा द्यावी लागली. विशेष म्हणजे, काही अन्य बाधित विद्यार्थ्यांनीही परीक्षा दिल्याची माहिती समोर आली आहे. त्यामुळे विद्यापीठाबाबत विद्यार्थ्यांमध्ये रोष निर्माण झालेला आहे. (M Tech student gave exam from ICU in Nagpur)

विद्यापीठाच्या पदव्युत्तर एम.ए., एम.एसस्सी. आणि एम.कॉम.च्या प्रथम सत्राच्या परीक्षा ५ ते २० मे दरम्यान महाविद्यालयस्तरावर घ्याव्या अशा सूचना देण्यात आल्या आहेत. यानुसार विविध महाविद्यालयांकडून आजपासून परीक्षा घेण्यास सुरवात झाली. यामध्ये रायसोनी अभियांत्रिकी महाविद्यालयानेही आजपासून परीक्षा घेण्यास सुरवात केली. कोरोनाच्या दुसऱ्या लाटेमध्ये अनेक प्राध्यापक, महाविद्यालयाचे कर्मचारी, विद्यार्थ्यांनी जीव गमावल्याने अशा भयावह परिस्थितीमध्ये परीक्षा घेऊ नये, किंवा विद्यार्थ्यांना परीक्षा अर्जासाठी आग्रह करू नये अशी मागणी प्राचार्य संघटनांकडून करण्यात आली.

यावर ऑनलाइन परीक्षा असल्याने त्या घेण्यास अडचण नसल्याचे विद्यापीठाकडून स्पष्ट करण्यात आले. त्यामुळे कोरोनाग्रस्त असलेल्या विद्यार्थ्यांनी परीक्षा सुटल्यास मग परीक्षा कशी होईल अशी समस्या समोर आल्याचे दिसून आले. त्यामुळे कशाही अवस्थेत परीक्षा द्यायची यामुळे परीक्षेचे टेन्शन घेत, परीक्षा देण्याचे ठरविले. त्यातूनच दोन दिवसांपूर्वी सामान्य वॉर्डात असलेली एम.टेक.ची मुलगी काल अतिदक्षता (आयसीयू) वॉर्डात दाखल झाली. मात्र, परीक्षा द्यायची असल्याने तीने याही अवस्थेत परीक्षा दिली. केवळ तीने एकटीनेच नव्हे तर बऱ्याच कोरोनाग्रस्त विद्यार्थ्यांनीही आज परीक्षा दिल्याचे कळते. मात्र, या प्रकाराने विद्यापीठातील प्राधिकरणाचे सदस्य आणि प्राचार्यांकडून मोठ्या प्रमाणात निषेध करण्यात येत आहे.

(M Tech student gave exam from ICU in Nagpur)