नागपूर : अवैध दारूविक्रेत्याला दारू उधार मागितल्याच्या कारणावरून झालेल्या वादातून युवकाचा तलवारीने भोसकून खून करण्यात आला. ही थरारक घटना शुक्रवारी माजरी गावात घडली. सुबोध ऊर्फ बापू विशाल मेश्राम (वय २२, रा. पाटील लेआऊट, माजरी) असे मृताचे नाव आहे. या प्रकरणी यशोधरानगर पोलिसांनी खुनाचा गुन्हा दाखल करून तिघांना अटक केली. प्रणय ऊर्फ गोलू राऊत (वय २२), सागर परिमल (वय २०) आणि अभिषेक चौधरी (सर्व रा. माजरी) अशी अटक करण्यात आलेल्या आरोपींची नावे आहेत. 

सविस्तर वाचा - खर्राच ठरतोय कोरोनाच्या वाढत्या संक्रमणाचे कारण; तपासणीत उशीर केल्याने भीतीचे वातावरण 

प्रणय हा पूर्वी कॅटरिंगचे काम करीत होता. पण, करोनामुळे देशात लॉकडाउन लागू झाल्यानंतर त्याचा रोजगार गेला. कुटुंबाच्या उदरनिर्वाहासाठी तो अवैधपणे देशी दारू विकत होता. सुबोध हा दारु पिण्याच्या सवयीचा असल्याने तो नेहमी प्रणयकडे दारू प्यायला यायचा. सुबोधवर दारुचे जवळपास हजार रुपये उधार होते. तो पैसे देत नसल्याने आरोपींसोबत त्याचा वाद होता. 

शुक्रवारी सायंकाळी तो दारू पिण्यासाठी गोलूच्या घरी आला. त्याने गोलूच्या आईला उधार दारू मागितली. मात्र तिने दारू देण्यास नकार दिला. त्यामुळे सुबोध चिडला. त्याने गोलूच्या आईला शिवीगाळ केली आणि निघून गेला. रात्री आठ वादताच्या सुमारास मुलगा गोलू घरी आला. त्याला आईने सुबोधने शिवीगाळ केल्याबाबत माहिती दिली.

शुक्रवारी रात्री १२.३० ते १.२० वाजेच्या सुमारास आरोपी सुबोधच्या घरी गेले. त्याला फोन करून बाहेर बोलावले. त्याला माजरी परिसरातील एम्ब्रॉयडरी कारखान्याजवळ गाठले. त्या ठिकाणी आरोपींनी सुबोधकडे पैशाची मागणी केली. त्याने नकार दिला असता दोघांमध्ये वाद झाला. या वादातून हाणामारी झाली. 

असे का घडले? - तो रडकुंडीस येऊन म्हणतो, दादाऽऽ दादाऽऽ रिक्षात बसा ना; हृदय हेलावून टाकणारा संघर्ष

त्यावेळी आरोपींनी मिळून चाकूने सुबोधच्या गळयावर मानेवर वार करून त्याचा खून केला. त्यानंतर आरोपी पळून गेले. माहिती मिळताच यशोधरानगर पोलीस ठाण्याचे वरिष्ठ पोलीस निरीक्षक रमाकांत दुर्गे हे इतर कर्मचार्यासह घटनास्थळी पोहोचले. पोलिसांनी गुन्हा दाखल करून आरोपींना अटक केली.

संपादन - अथर्व महांकाळ