नागपूर : माजी जिल्हा प्रमुख शेखर सावरबांधे यांनी शिवबंधन तोडल्याने शिवसेनेमध्ये (Shivsena) चांगलीच खळबळ उडाली आहे. या घटनेची मुंबईतून दखल घेण्यात आली असून नागपूरमधील उफाळून आलेल्या असंतोषाचे कारण काय अशी विचारणा एका माजी पदाधिकाऱ्यांना करण्यात आली आहे. त्यांना तातडीने मुंबईला बोलावण्यात आले असल्याने लवकरच संघटनेत मोठे फेरबदल होण्याची शक्यता वर्तविली जात आहे.

सावरबांधे पाठोपाठ अनेक पदाधिकारी सेना सोडण्याच्या तयारीत आहेत. यात एका नगरसेवकाचाही समावेश असल्याचे कळते. स्थानिक नेत्यांमुळे अनेक पदाधिकारी अस्वस्थ आहेत. मोठी पदे दिली तर त्यांना निर्णय घेण्याचे अधिकारसुद्धा देण्यात आले नाही. काहींना मुंबईतील पदाधिकाऱ्यांशी बोलण्यासही मनाई करण्यात आल्याचे समजते. शिवसेनेत प्रवेश करून फसलो अशी भावना आता अनेक पदाधिकारी खासगीत व्यक्त करीत आहेत. त्यामुळे कुठल्याही क्षणी शिवसेनेत मोठा स्फोट होण्याची शक्यता वर्तविली जात आहे.

नागपूरचे संपर्क प्रमुख आमदार दुष्यंत चतुर्वेदी यांनी शहराची कार्यकारिणी जाहीर केली तेव्हापासूनच असंतोष उफाळून आला आहे. जिल्हा प्रमुख, संपर्क प्रमुख राहिलेल्या पदाधिकाऱ्यांचे डिमोशन केले होते. उलट कालपरवा काँग्रेसमधून आलेल्यांना डोक्यावर बसवल्याने नाराजी वाढली आहे. माजी जिल्हा प्रमुख सतीश हरडे यांनी त्याचवेळी नाराजी दर्शवून आपण दिलेली जबाबदारी पार पाडू शकत नाही असे कळविले होते. सावरबांधे यांनी प्रतिक्रिया व्यक्त केली नव्हती. मात्र, पदभारसुद्धा स्वीकारला नव्हता. आजही अनेक निष्ठावंत शिवसेनेत आहेत. मात्र, पक्षकार्यापासून अलिप्त आहेत. अनेकजण आपल्या स्तरावर काम करीत आहेत. सावरबांधे तडाकाफडकी पक्ष सोडतील असे कोणालाच वाटले नव्हते. राष्ट्रवादी काँग्रेसमध्ये जाण्यापूर्वी त्यांनी इतरांसोबत सल्लामसलतसुद्धा केली नाही. आता त्यांच्या पावलावर पाऊल ठेवून नाराज पदाधिकारी बाहेर पडू शकतात अशी भीती वर्तविली जात आहे. नाराज असलेल्यांना रोखण्यासाठी एका स्थानिक शिवसैनिकावर जबाबदारी सोपवण्यात आली आहे. त्यांनी आज सुमारे डझनभर सैनिकांना फोन केले. कुठलाही आततायी निर्णय घेऊ नका अशी सूचना सर्वांना देण्यात आल्याचे समजते.