नागपूर : दीड वर्षांपासून सर्व निवासी डॉक्टर (Resident Doctors) कोरोना रुग्णांवरील (Corona Patients) उपचारात गुंतवण्यात आले आहे. इतर रुग्ण तपासण्यासाठी वेळच दिला जात नाही. आता कोरोना काहीसा कमी झाला आहे. आतातरी सर्जिकल कॉम्प्लेक्स (Surgical Complex Nagpur) नॉनकोविड रुग्णांसाठी सुरू करण्यात यावे, अशी मागणी होत आहे. मात्र स्थानिक प्रशासनाने निवासी डॉक्टरांच्या मागण्यासंदर्भात कोणताही निर्णय न घेतल्याने सामूहिक रजेवर असलेल्या मार्ड संघटनेतर्फे अतिदक्षता विभागातील सेवा बंद करण्याचा इशारा दिला आहे. (MARD doctors protesting in Nagpur Mayo hospital)

मेयो रुग्णालयात सुमारे २४० पेक्षा अधिक निवासी डॉक्टर आहेत. मेडिसीन, पॅथालॉजी, कान नाक घसा विभाग, सामाजिक वैद्यक शास्त्र, सर्जरी, नेत्र, बालरोग विभाग, प्रसूती रोग विभाग तसेच इतरही विभाग आहेत, मात्र साऱ्या निवासी डॉक्टरांना कोविड रुग्णांची जबाबदारी देण्यात आली. तेव्हापासून केवळ कोरोना रुग्णांवरच उपचार करण्यात येत आहेत. यामुळे इतर विषयांकडे दुर्लक्ष झाले आहे. सध्या मेयो असो की, मेडिकल येथे रुग्णसंख्या कमी झाली आहे.

यामुळे आता नियमित ज्या विभागाशी संबंधित निवासी डॉक्टर आहेत, त्यांना त्या विभागाचा अभ्यास करण्यासाठी मोकळीक द्यावी. मात्र स्थानिक प्रशासन चुप्पी साधून आहे. यामुळे संतप्त झालेल्या निवासी डॉक्टरांनी सामूहिक रजा आंदोलन सुरू असतानाच अतिदक्षता विभागातील सेवा थांबवण्याचा इशारा दिला आहे.

मार्ड संघटनेचे अध्यक्ष डॉ. रजत अग्रवाल,डॉ. आसिफ पटेल, डॉ. ईश्वर पाटील, डॉ. गणेश पारवे, डॉ. आशिष केंद्रे, डॉ. अद्वैत मुळे, डॉ. सुभाष पाटील, डॉ. सुजाता मेटे, डॉ. ख्याती जैन यांच्यासह शेकडो डॉक्टर मेयो परिसरात उभारलेल्या मंडपात दिवसभर स्थानिक निर्णयाच्या प्रतीक्षा करीत बसून असतात.

(MARD doctors protesting in Nagpur Mayo hospital)