नागपूर : महापौर संदीप जोशी यांचा कोरोना अहवाल पॉझिटिव्ह आला आहे. त्यांनी स्वतः ट्विट करून याबद्दल माहिती दिली आहे. तसेच गेल्या काही दिवसांत संपर्कात आलेल्या नागरिकांनी स्वतःच्या आरोग्याची काळजी घ्यावी, असेही त्यांनी म्हटले आहे.

गेल्या ८ महिन्यांपासून कोरोनाशी लढत असून शेवटी मलाच कोरोनाची लागण झाली आहे. काल कोरोनाची चाचणी पॉझिटिव्ह आली असून डॉक्टरांच्या सल्ल्याने उपचार घेत असल्याचे त्यांनी सांगितले. तसेच गेल्या काही दिवसांत संपर्कात आलेल्या लोकांनी कोरोना चाचणी करावी, असा सल्लाही त्यांनी दिला आहे.

नुकत्याच पदवीधर मतदारसंघाच्या निवडणूक पार पडली आहे. संदीप जोशी यांनी भाजपच्या उमेदवारीवर ही निव़डणूक लढविली होती. या निवडणुकीचा प्रचारासाठी ते गोंदिया, भंडारा, चंद्रपूर, गडचिरोली, वर्धा आणि नागपूर जिल्ह्यात ते फिरले होते. त्यामुळे अनेक कार्यकर्ते तसेच मतदार त्यांच्या संपर्कात आले होते. त्यामुळे या सर्वांनी स्वतःच्या आरोग्याची काळजी घ्यावी, असे आवाहन त्यांनी केले आहे.  

दरम्यान, नागपुरात बुधवारी कोरोनाचे नव्याने ४०३ रुग्ण सापडले असून ९ कोरोनाबाधितांचा मृत्यू झाला आहे. सध्या एकूण  ५८७३ जणांवर उपचार सुरू आहे. यापैकी ११०९ रुग्ण नागपुरातील इंदिरा गांधी शासकीय वैद्यकीय महाविद्यालय, मेडीकलसह जिल्ह्यातील रुग्णालयात उपचार घेत आहेत, तर उर्वरीत रुग्ण गृहविलगणीकरणात आहेत.