नागपूर : विश्‍वविजेती पी. व्ही. सिंधू, ऑलिंपिक ब्रॉंझपदक विजेती साईना नेहवाल यांच्यानंतर भारतीय बॅडमिंटनमध्ये कोण? असा प्रश्‍न विचारला, तर गुणवत्ता असलेल्या अनेक युवा मुलींची नावे पुढे येतात. मात्र, सध्याच्या परिस्थितीत जागतिक बॅडमिंटन महासंघाच्या मानांकनाचा विचार केल्यास सिंधू, साईनानंतर भारतीय बॅडमिंटनमध्ये महिला एकेरीत नागपूरकर मुग्धा आग्रे "बेस्ट' असल्याचे सिद्ध झाले आहे.
जागतिक बॅडमिंटन महासंघ प्रत्येक आठवड्याला खेळाडूंच्या आंतरराष्ट्रीय स्पर्धेतील कामगिरीच्या आधारावर मानांकन जाहीर करीत असते. नुकत्याच जाहीर झालेल्या यादीत पी. व्ही. सिंधू सहाव्या तर साईना नेहवाल अकराव्या स्थानावर आहे. यानंतर मानांकनातील भारतीय खेळाडूंत नागपूरची मुग्धा आग्रे हिचा क्रमांक आहे.
सध्या ती 73 व्या स्थानावर आहे. गेल्या पाच महिन्यांपासून मानांकनात सिंधू, साईनानंतर भारतीय खेळाडूंत मुग्धाचा क्रमांक आहे. एलएडी महाविद्यालयाची विद्यार्थिनी असलेल्या मुग्धाचे सर्वोत्तम मानांकन 19 नोव्हेंबर 2019 रोजी 59 असे होते. यापूर्वी अरुंधती पानतावणे ही जागतिक बॅडमिंटन महासंघाच्या महिला एकेरी मानांकनात सर्वोत्तम मानांकन मिळविणारी नागपूरची खेळाडू होती. तिने 40 व्या स्थानापर्यंत झेप घेतली होती.
गेल्यावर्षी मुग्धाने तेरा आंतरराष्ट्रीय स्पर्धेत भाग घेतला. त्यापैकी घाना येथील स्पर्धेत तिला उपविजेतेपदावर समाधान मानावे लागले. तिने पाच स्पर्धेत उपांत्यपूर्व फेरीपर्यंत मजल मारली. यामुळेच तिला मानांकनात सुधारणा करता आली. जागतिक मानांकनात तिने सुधारणा केली असली तरी भारतीय बॅडमिंटन महासंघाच्या मानांकनात मात्र, ती बरीच पिछाडीवर आहे. त्यामुळे जीबी वर्गीस यांच्या मार्गदर्शनाखाली मानकापूर येथील क्रीडा संकुलात सराव करणाऱ्या मुग्धाने अखिल भारतीय आणि आंतरराष्ट्रीय स्पर्धेतील सहभागाचा संतुलन करण्याचा मानस व्यक्त केला आहे. आपले भारतीय मानांकन सुधारावे यासाठी ती जानेवारी महिन्यात बंगळूर आणि गोवा येथील अखिल भारतीय स्पर्धेत सहभागी होणार आहे.
सिंधू, साईनानंतर जागतिक मानांकनातील भारतीय खेळाडूंत माझा क्रमांक असल्याचा अभिमान असला तरी ते पुरेसे नाही. मला आणखी झेप घ्यायची आहे. जागतिक मानांकनासोबत भारतीय मानांकनही सुधारायचे आहे आणि हा समतोल यंदा सांभाळण्याचा प्रयत्न करणार आहे, असे मुग्धा म्हणाली.
मुग्धा आग्रे
जागतिक मानांकन : 73
भारतीय मानांकन : 52
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.