नागपूर : खिशातून पाचशे रूपये हिसकल्यामुळे राग अनावर झाल्याने युवकाने एका मित्राचा चाकूने भोसकून खून केला. हा थरार पाचपावलीतील सिद्धार्थनगरात घडला. विक्‍की उर्फ विठ्‌ठल सिद्धार्थ बागडे (वय 20) असे खून झालेल्या युवकाचे नाव आहे. पाचपावली पोलिसांनी आरोपीस अटक केली. 

पोलिसांनी दिलेल्या माहितीनुसार, विक्‍की बागडे हा पाचपावली परिसरात टोळी तयार करून दादागिरी करीत होता. गुन्हेगारी प्रवृत्तीच्या विक्‍कीचा दबदबा होता. आज रविवारी दुपारी विक्‍कीची आरोपी प्रभाकर मेश्राम (वय 50) याची भेट झाली. विक्‍कीने प्रभाकरला पैसे मागितले. मात्र, प्रभाकरने पैसे देण्यास नकार दिला. त्यामुळे विक्‍कीने प्रभाकरच्या खिशातून बळजबरीने पाचशे रूपये काढले. पोलिसात तक्रार केल्यास 'गेम' करण्याची धमकी दिली. यापूर्वीही विक्‍की आणि त्याची टोळी प्रभाकरला त्रास देत होती. त्यामुळे प्रभाकर विक्‍कीच्या त्रासाला कंटाळला होता. पाचशे रूपये हिसकल्यामुळे प्रभाकरचा पारा चढलेला होता.

हेही वाचा : गोदामात आधीच 40 हजार टन साठा, आणखी धानखरेदी कशी करणार? 

सायंकाळच्या सुमारास विक्‍की सिद्धार्थनगर, टेका येथे उभा होता. प्रभाकरने त्याला पैसे परत मागितले. मात्र, विक्‍कीने त्याला शिवीगाळ करीत मारहाण केली. त्यामुळे प्रभाकरने खिशातून चाकू काढून विक्‍कीच्या पोटात भोसकला आणि पळून गेला. विक्‍कीच्या मित्रांनी त्याला मेयोत नेले. मात्र, रस्त्यातच विक्‍कीचा मृत्यू झाला. या प्रकरणी पाचपावली पोलिसांनी प्रभाकरविरूद्ध गुन्हा दाखल करून अटक केली.