खापरखेडा (जि. नागपूर) : खापरखेडा पोलिस ठाणेअंतर्गत पिपळा डाकबंगला येथील शिवली बोधी भिख्खू निवासात भंतेजीने महिला भंतेजीची हत्या केली. ही घटना रविवारी (ता. २९) दुपारच्या सुमारास उघडकीस आली. या घटनेमुळे परिसरात एकच खळबळ उडाली आहे. सामनेरी बुद्ध प्रिया ऊर्फ कुसुम सुनील चव्हाण (वय ४५, रा. इंदिरानगर, पेट्रोल पंप जवळ, जरीपटका पोलिस स्टेशन समोर) असे मृत महिला भंतेजीचे नाव आहे. तर भदंत धम्मानंद थेरो ऊर्फ रामदास झिनुजी मेश्राम (वय ५८. रा. पिंपळा डाग बंगला, मूळ गाव यशोधरानगर, संजय गांधीनगर वॉर्ड नंबर २, फेजपुर, अमरावती) असे आरोपीचे नाव आहे.

पोलिसांनी दिलेल्या माहितीनुसार, भंते भदंत धम्मानंद थेरो याने मृत महिला भंते सामनेर बुद्ध प्रियावर भाजी कापण्याच्या तीन चाकूने गळ्यावर सपासप वार करून रक्ताच्या थारोळ्यात लोळविले. इतकेच नव्हे तर तोंडावर हातोडा मारून हत्या केली. शिवली बोधी भिख्खू निवास हे मागील २०१७ पासून पिंपळा डाग बंगला येथे लोकवर्गणीच्या माध्यमातून सुरू आले.

भिख्खू निवासाच्या बाजूलाच मृत महिलेचा प्लॉट असल्याची माहिती सूत्रांकडून मिळाली. आरोपी हा तो प्लॉट हडप करण्याच्या बेतात होता. मृत व आरोपी या दोघांमध्ये नेहमीचे खटके उडायचे. मृत महिलाही नागपूरवरून अधूनमधून ये-जा करीत होती. तिने बदनामी केल्यामुळे आरोपी त्रस्त झाला होता. भिख्खू निवासात प्रिया पलंगावर झोपल्याची संधी साधून भाजी कापण्याच्या तीन चाकूने सपासप वार केले. शिवाय तोंडावर व डोक्यावर हातोडा मारून हत्या केली.

या घटनेची माहिती वाऱ्यासारखी पसरली. लागलीच खापरखेडा पोलिसांना माहिती मिळताच पोलिस उमेश ठाकरे, नूमान शेख यांच्यासह पोलिस ताफा घटनास्थळी पोहोचला. घटनेचा पंचनामा करून मृतदेह शासकीय रुग्णालयात तपासणीसाठी पाठविण्यात आला. प्लॉटच्या वादातून हे हत्याकांड घडल्याची चर्चा परिसरात होती. घटनास्थळावरून हत्येसाठी वापरलेला चाकू, हातोडा जप्त करण्यात आला आहे. तसेच आरोपीला अटक केली आहे. सदर घटनेतील आरोपी बोधी धम्मानंद थेरो यांच्यावर गुन्हा दाखल केला असून पुढील तपास सुरू आहे.