Truck Accident: भरधाव ट्रकने दिलेल्या धडकेत दुचाकीस्वार दोन तरुणांचा मृत्यू झाला तर, एक जण गंभीर जखमी झाला. ही घटना सोमवारी (ता.२५) रात्री साडेनऊ वाजता यवतमाळ-घाटंजी मार्गावरील निळोणा पुलावर घडली.

कैलास वसंता दाभेकर (वय २५) व दुर्गेश बाबाराव राड्डी (वय ३०, दोघेही रा. कार्ली) अशी मृतांची नावे आहेत. विजय रामू टेकाम (वय २६, रा. कार्ली) हा गंभीर जखमी झाला. तिघेही दुचाकीने यवतमाळकडून कारेगाव यावलीकडे जात होते. दुचाकी विजय टेकाम चालवीत होता. निळोणा पुलावर भरधाव ट्रकने धडक दिली.

त्यात गंभीर जखमी झालेल्या तिघांना यवतमाळ येथील वसंतराव नाईक शासकीय वैद्यकीय महाविद्यालयात उपचारासाठी हलविण्यात आले. अपघाताची माहिती मिळताच नातेवाइकांनी रुग्णालयात धाव घेतली. डॉक्टरांनी तपासणी करताच कैलास दाभेकर याला मृत घोषित केले. गंभीर जखमी असलेले दुर्गेश राड्डी व विजय टेकाम यांना पुढील उपचारासाठी नागपूरला रेफर करण्यात आले. (Latest Marathi News)

त्यापैकी दुर्गेश याचा उपचारादरम्यान मृत्यू झाला. पोलिसांनी घटनास्थळ गाठून पंचनामा केला. याप्रकरणी महादेव वासुदेव दाभेकर (वय २८, रा. कार्ली) याने यवतमाळ ग्रामीण पोलिस ठाण्यात तक्रार दिली. त्यावरून ट्रकचालकाविरुद्ध गुन्हा नोंदविण्यात आला आहे. याबाबतचा पुढील तपास ठाणेदारांच्या मार्गदर्शनाखाली करण्यात येत आहे.