नागपूर - बनावट चलन आणि बेहिशोबी मालमत्ता असल्याच्या संशयावरून दहशतवाद विरोधी पथकाने (एटीएस) शहरातील हसनबाग परिसरात बुधवारी (ता.१८) दुपारच्या सुमारास तीन ठिकाणी छापे टाकले. पथकाने दोघांकडून २७ लाख ५० हजार रुपयांची बेहिशोबी रोख रक्कमही जप्त केली. अधिक चौकशीसाठी एटीएसने परवेझ पटेल (रा. हसनबाग) आणि त्याचा सहकारी अब्दुल वसीम या दोघांनाही ताब्यात घेतले आहे.

विशेष म्हणजे, परवेझ याच्यावर यापूर्वीही फसवणुकीचा गुन्हा दाखल आहे. परवेझकडे असलेली बेहिशेबी रोख रक्कम आणि बनावट नोटा चलनाच्या प्रकरणात गुंतल्याचे संकेत मिळाल्यानंतर हे छापे टाकण्यात आले.

दुपारी एटीएसच्या तीन वेगवेगळ्या पथकांनी एकाच वेळी परवेझचे निवासस्थान, त्याचे कार्यालय आणि अब्दुलच्या घराची झडती घेतली. सुमारे तीन तासांच्या अथक शोधानंतर, एटीएसला परवेझच्या घरातील लॉकरमधून तब्बल २७.५० लाख रुपयांची रोख रक्कम जप्त करण्यात यश आले. या बेहिशेबी संपत्तीचा स्रोत शोधण्यासाठी एटीएस अधिकारी पटेल यांची चौकशी करत आहेत, असे एका अधिकाऱ्याने सांगितले.

परवेझ पटेल याच्यावर नंदनवन पोलिसांनी या वर्षी एप्रिलमध्ये फसवणुकीचा गुन्हा दाखल केला होता. मध्य प्रदेशातील राकेश उमरे याला १.२५ कोटी परत करण्याचे आश्वासन देऊन २५ लाखांची फसवणूक केल्याचा आरोप त्याच्यावर होता. पराग मोहोड, कांचन गोसावी आणि अन्य दोघांना फसवणूक प्रकरणात गोवण्यात आले. परवेझ, एक माजी पोलीस माहिती देणारा, कथितपणे त्याच्या पीडितांना धमकावण्यासाठी, पोलिस अधिकाऱ्यांशी संबंध असल्याचा दावा करून, धमकावण्याच्या प्रयत्न त्याने केला होता.

चलनाची वैधता तपासणार एटीएस

परवेझ हा नकली नोटा चलनात आणण्याच्या रॅकेटमध्ये असल्याची माहिती एटीएसला मिळाली होती. दरम्यान त्यातूनच हा छापा एटीएसद्वारे टाकण्यात आला. त्याच्या घरातून सापडलेल्या २७ लाख ५० हजाराचा चलनी नोटा खऱ्या आहेत की खोट्या याची वैधता एटीएस तपासणार आहे. बनावट नोटा चलनात आणल्याबद्दल परवेझ हा परिसरात प्रसिद्ध होता आणि त्याच्यावर नुकत्याच झालेल्या फसवणुकीच्या गुन्ह्यांमुळे या संशयांना आणखी बळ मिळाले, अशी माहिती सूत्रांनी दिली आहे.