नागपूर : तबलिगी जमातीमधील १२ नागरिकांविरुद्ध बुलडाणा पोलिसांनी दाखल केलेले गुन्हे आणि दोषारोपपत्र मुंबई उच्च न्यायालयाच्या नागपूर खंडपीठाने रद्द केले. दाखल गुन्हे व दोषारोपपत्र रद्द करावे, या विनंतीसह जमातीतील कामठी (जि. नागपूर) येथील ११ व बुलडाणा येथील एका नागरिकाने संयुक्त फौजदारी अर्ज दाखल केला होता.

यावर न्यायमूर्ती झेड. ए. हक आणि न्यायमूर्ती अमित बोरकर यांच्या समक्ष सुनावणी झाली. अर्जानुसार, बुलडाणा येथील हुसैनिया मरकज मशिदमधील नागरिकांविरुद्ध बुलडाणा शहर पोलिसांनी कारवाई करीत कोरोना चाचणी केली. यामध्ये, सर्व आरोपींची चाचणी पॉझिटिव्ह आल्याचे आरोप ठेवत बुलडाणा पोलिस ठाण्याने साथ रोग व आपत्ती नियंत्रण कायद्यांतर्गत १२ नागरिकांविरुद्ध गुन्हे दाखल केले.

दुसऱ्यांदा कोरोना चाचणी केली असता ११ पैकी ३ जणांची चाचणी पॉझिटिव्ह आले व शहरामध्ये जमावबंदी असताना शासनाच्या परवानगी शिवाय मशिदीमध्ये नागरिक जमल्याचे आरोप पोलिस प्रशासनाने केले. याबाबत पोलिसांनी कनिष्ठ न्यायालयामध्ये दोषारोपपत्र दाखल केले. उच्च न्यायालयात सुनावणी दरम्यान हे नागरिक पॉझिटिव्ह असल्याचे सिद्ध होऊ शकले नाही. तसेच, नागपूर खंडपीठाने यापूर्वी दिलेल्या आदेशाचे दाखले युक्तिवाद दरम्यान देण्यात आले. सर्व बाजू लक्षात घेता उच्च न्यायालयाने दाखल गुन्हे आणि दोषारोपपत्र रद्द केले. अर्जदारांतर्फे ॲड. मीर नगमान अली यांनी बाजू मांडली.