नागपूर : कामठी विधानसभा मतदार संघातील (Kamptee assembly constituion) आमदार टेकचंद सावरकर (MLA Tekchand Sawarkar) यांच्या निवडणुकीला आव्हान देणारी याचिका मुंबई उच्च न्यायालयाच्या नागपूर खंडपीठाने फेटाळली. सादूकर हटवार यांनी यासंदर्भात याचिका दाखल केली होती.

याप्रकरणी न्यायमूर्ती पुष्पा गणेडीवाला यांच्यासमक्ष सुनावणी झाली. याचिकेनुसार, २०१९ साली पार पडलेल्या विधानसभेच्या निवडणुकीदरम्यान, टेकचंद सावरकर यांनी नामांकन अर्ज भरताना प्रतिज्ञापत्रामध्ये घरातील लोकांची नावे, संपत्ती, देयके, बँकेचे खाते क्रमांक, तारण असलेली संपत्ती व त्यांच्यावर असलेले एकूण कर्ज याची माहिती लपवून ठेवली होती. तसेच, निवडणूक अधिकार्‍यांनीही सावरकरांचा नामांकन अर्ज स्विकारतांना योग्य प्रक्रिया पार पाडली नाही, असा दावा करीत हटवार यांनी सावरकरांच्या निवडणुकीला आव्हान दिले होते.

तसेच, त्यांची निवडणूक अवैध ठरवून रद्द करण्यात यावी व कामठी मतदारसंघात नव्याने निवडणूक घेण्यात यावी असेही याचिकाकर्त्याच्या म्हणणे होते. सुनावणी दरम्यान, याचिकाकर्त्याने मांडलेले मुद्दे न्यायालयाचे समाधान करू शकले नाही. त्यामुळे, न्यायालयाने ही याचिका गुणवत्ताहीन ठरवत नागरी प्रक्रिया कायदा आदेश 7 कलम 11(अ) अन्वये फेटाळून लावली. तसेच, निवडणूक आयोग आणि विधानसभा अध्यक्षांना पंधरा दिवसांमध्ये या आदेशाची प्रत पाठवावी असे आदेश न्यायालयाने रजिस्ट्रीला दिले. याचिकाकर्त्यातर्फे अ‍ॅड. आर. एम. भांगडे, आ. सावरकर यांच्यातर्फे अ‍ॅड. एच. डी. डांगरे यांनी बाजू मांडली.