Nagpur - सुपरच्या मेंदूरोग उपचार विभागात उपचारासाठी आलेल्या रुग्णांना शस्त्रक्रियेदरम्यान चक्क शुद्धीवर ठेवून त्यांच्या मेंदूतील ‘ट्यूमर’ (गाठ) काढण्याची शस्त्रक्रिया यशस्वी करण्यात डॉक्टरांना यश आले. यात दोन रुग्णांना जीवनदान मिळाले. ठणठणीत बरे होऊन ते घरी परतले.

सुपर स्पेशालिटीतील मेंदूरोग विभागात ४ कोटी खर्चून मेंदूरोग उपचार विभागात अत्याधुनिक मॉड्युलर ओटी तयार केली आहे. याच शस्त्रक्रियागारात अवघ्या विशीतील मिथिलेश गौतम आणि तिशीतील रेखा झंजाळ या दोन रुग्णांना शुद्धीत ठेवत त्यांच्या मेंदूतील ट्यूमर काढला.

नागपूर येथील मिथिलेश आणि मध्यप्रदेशातील रहिवासी असलेल्या रेखा यांना डोक्यात तीव्र वेदना होत होत्या. नातेवाइकांनी तपासणीसाठी खासगीत नेले. परंतु उपचार परवडणारे नसल्याने अखेर सुपरच्या बाह्यरुग्ण विभागात आणले. मेंदूतील गाठीमुळे दोघांनाही बोलता येत नव्हते.

सुपरमधील सहयोगी प्राध्यापक डॉ. संजोग गजभिये यांनी चाचण्या केल्या. मेंदूत डाव्या बाजूला ट्यूमर असल्याचे निदान झाले. ही शस्त्रक्रिया करताना डाव्या भागातील मेंदू पेशींना इजा होण्याची मोठी जोखीम होती. पण डॉ. प्रमोद गिरी यांच्या मार्गदर्शनात डॉ. गजभिये यांनी केवळ ट्यूमर असलेला भाग बधिर करून गाठ काढली.

डॉ. प्रमोद गिरी यांच्या नेतृत्वाखाली न्यूरोसर्जन डॉ. संजोग गजभिये, सहयोगी प्राध्यापक डॉ. श्रीकांत कालबगवार, न्यूरो भूलतज्ज्ञ डॉ. शिल्पा जैस्वाल, डॉ. पंकज भोपळे, डॉ. मंगेश मुळावकर, डॉ. कमलेश रंगारी, डॉ. पीयुष ठोंबरे यांच्या वैद्यकीय पथकाने मेंदूतील ट्यूमर ‘अवेक क्रिनिऑटॉमी’ची शस्त्रक्रिया यशस्वी केली.

दोन्ही रुग्णांना ब्रेन ट्यूमर होते. जोखमीची शस्त्रक्रिया होती. इजा झाली असती तर दोघेही बोलण्याची क्षमता गमावून बसले असते. केवळ शस्त्रक्रियेसाठी आवश्यक भाग बधिर केला आणि या रुग्णांवर शल्यक्रिया केली. याला वैद्यकीय भाषेत ‘अवेक क्रिनिऑटॉमी’ असे संबोधले जाते.

- डॉ. संजोग गजभिये, मेंदूरोग सर्जन, सुपर स्पेशालिटी.