नागपूर : शहरात असलेल्या मध्यवर्ती कारागृहात गेल्या वर्षभरात कैद्यांकडे मोबाईल, बॅटरीसह मोठ्या प्रमाणात गांजा मिळाल्याच्या घटना उघडकीस आल्या आहेत. केंद्रीय मंत्री नितीन गडकरी यांच्या कार्यालयात फोन करून धमकी देत, खंडणी मागितली. त्याने हा फोन बेळगावच्या कारागृहातून केला असल्याची बाब समोर आली. नागपूरच्या मध्यवर्ती कारागृहातही दररोज कुठल्या ना कुठल्या मार्गाने मोबाईल, बॅटरी आणि गांजा जात असल्याने आता येथेही ‘कर्नाटक पॅटर्न’ राबविण्यात येत आहे.

दोन दिवसांपूर्वी टावरवरून कारागृहात गांजा, मोबाईल, बॅटरी आणि सीमकार्ड फेकण्यात आल्याची घटना समोर आली. त्यामुळे कारागृहात सर्रास आजही त्याचा वापर होत असल्याचे दिसते.

कारागृहात मोबाईल, गांजा पोहचतो कसा? हे मोठे गुढ आहे. मात्र, त्यासाठी कारागृहातील रक्षक ही मोठी कडी असल्याचे दिसते. कारागृहात बंदिवानांसोबत वावरणारे रक्षकच त्यांना ते पुरविण्यात मदत करीत असल्याचे निदर्शनास आले आहे. गेल्या वर्षभरात त्यातून सहा कारवाया करीत, चार ते पाच तुरुंग रक्षकांवर गुन्हेही दाखल करण्यात आले आहे.

मात्र, कारवाईचा धाक न बाळगता, त्यानंतरही कारागृहात मोबाईल, बॅटरी सीमकार्ड आणि गांजाची खेप सुरूच असल्याचे दिसून येते.

टॉयलेट, जमिनीत लपविले जाते साहित्य

कारागृहात मोबाईल, सीमकार्ड, बॅटरी आणि गांजा पोहचल्यावर तो लपवून ठेवण्यासाठी कारागृहातील टोपीधारक बंदिवानाचा उपयोग केला जातो. त्यांच्या माध्यमातून टॉयलेट्स आणि जमिनीमध्ये हे साहित्य पुरविले जाते. विशेष म्हणजे, जयेश पुजारी यानेही बेळगावात अशाच प्रकारे जमिनीमध्ये मोबाईल आणि बॅटरी लपवून ठेवल्याची बाब समोर आली होती.

असे आहे रॅकेट

अट्टल गुन्हेगार जे बंदिवान म्हणून कारागृहात शिक्षा भोगत आहेत, त्यांना आवश्‍यक असलेले मोबाईल, सीमकार्ड, बॅटरी आणि गांजा यासाठी भेटीद्वारे आपली डिमांड त्यांना भेटायला येणाऱ्या साथीदारांना कळवितात. ते साथीदार कारागृह रक्षकांशी भेटतात.

यामध्ये अनेक सुटलेल्या बंदिवानांचाही समावेश असतो. ते कारागृह रक्षकांशी संपर्क करीत, त्यांच्या माध्यमातून कारागृहात साहित्य पोहचविण्याचे काम करतात. यावेळी ते साहित्य मिळवून ते लपविण्यासाठी कारागृहातील काही टोपी मिळालेल्या बंदिवानाचाही उपयोग करीत असल्याची माहिती आहे.