बुटी ले-आऊट : सध्या मुलांना उन्हाळ्याच्या सुट्या आहेत. सुटीच्या दिवसांत सायंकाळी बच्चे कंपनीचा भर मैदानी खेळावर असतो. त्यामुळे मोठ्या संख्येने मुलं बगिच्याकडे वळतात. परंतु व्हीव्हीआयपींची वस्ती असलेल्या लक्ष्मीनगरातील बुटी ले-आऊटमधील गार्डन तुम्ही चिमुकल्यांसह येत असाल तर सावध राहा. कारण गार्डनमध्ये मांडीभर खड्डा पडला आहे. जो लहान मुलांसाठी अतिशय धोकादायक आहे. याशिवाय अनेक समस्या येथे आहेत.

शहरातील सर्वसामान्यांच्या वस्तीतील गार्डनचीच अवस्था खराब आहे, असे नाही. व्हीआयपी किंवा राजकीय नेत्यांच्याही वस्तीला उदासीनतेचे ग्रहण लागले आहे. याचे जिवंत उदाहरण लक्ष्मीनगर येथील बुटी ले-आऊटमधील गार्डन आहे. येथे माजी आमदार राहतात. अगदी त्यांच्या घरासमोर मनपाचे छोटे मैदान आहे.

एका राजकीय नेत्याच्या वस्तीत गार्डन असल्याने साहजिकच चांगल्या सोयी-सुविधांची अपेक्षा असते. मात्र, येथील गार्डन पाहून ती अपेक्षा फोल ठरते. गार्डनचा फेरफटका मारला असता जागोजागी कचरा व पालापाचोळा पडलेला दिसला. गार्डनची एकूणच अवस्था पाहून, येथे नियमित स्वच्छता होत असेल असे अजिबात वाटत नाही. गार्डन आहे पण हिरवळ (लॉन) अजिबात नाही. त्यामुळे पावसाळ्याच्या दिवसांमध्ये सर्वत्र चिखल साचतो. शिवाय टाइल्स उखडल्या व तुटलेल्या आहेत.

मांडीभर खड्डा पडला आहे, जो लहान मुलांसाठी धोकादायक आहे. उल्लेखनीय म्हणजे, येथे परिसरातील नागरिकांना शतपावलीसाठी साधा वॉकिंग ट्रॅकदेखील नाही. गार्डनमध्ये लहान मुलांना खेळण्यासाठी भरपूर खेळणी आहेत. मात्र त्याचीही अवस्था फारशी समाधानकारक नाही. त्यामुळे येथे मनोरंजन व विरंगुळ्यासाठी येणाऱ्यांसाठी हे गार्डन डोकेदुखी अधिक आहे.