नागपूर - पत्नी नांदायला घरी येत नसल्याने संतापलेल्या जावयाने सासूवर चाकूने हल्ला करून तिच्या खुनाचा प्रयत्न केला. पत्नीलाही त्याने जखमी केले. ही धक्कादायक घटना बुधवारी (ता.४) दुपारी पारडी परिसरात घडली. जखमी सासूवर मेयोत उपचार सुरू असून आरोपीला पोलिसांनी अटक केली आहे.

जानकी शाहू (वय ४५, रा. शितला माता मंदिराजवळ, पारडी) असे जखमी सासूचे तर दुलेश्वरी (वय २८) असे पत्नीचे नाव आहे. राजेंद्र शाहू (वय २८, रा. डिप्टी सिग्नल, कळमना) असे अटकेतील आरोपी जावयाचे नाव आहे. राजेंद्रला दारूचे व्यसन आहे. तो काही दिवसांपूर्वी ड्रायव्हर म्हणून कामाला होता. अलीकडे टाइल्स फिटिंगच्या कामाला जायचा. काम नसल्यास दारूच्या नशेतच असायचा.

अशातच एप्रिल महिन्यात जानकी यांची मुलगी दुलेश्वरीचे लग्न राजेंद्रसोबत झाले होते. मात्र, लग्नानंतरच राजेंद्रच्या व्यसनाबाबत समजले. यावरून त्यांच्यात खटके उडत. सततच्या त्रासाला कंटाळून दुलेश्वरी माहेरी निघून गेली आणि आई- वडिलांसोबतच राहत होती. तिकडे दुलेश्वरी घरी यावी, यासाठी राजेंद्र प्रयत्न करीत होता. त्यातून त्याने सासूला अनेकदा विनवण्याही केल्या. पण, काहीच उपयोग होत नसल्याने तो संतापला.

बुधवारी दुपारी दोन वाजताच्या सुमारास तो दारूच्या नशेतच सासूच्या घरी पोहोचला. सासरे दुबकुमार कामावर गेले होते. बाहेरूनच त्याने पत्नीला आवाज दिला आणि तिला घरी परत चलण्यास सांगितले. मात्र, दुलेश्वरीने स्पष्टच नकार दिला. संतापाच्या भरात त्याने चाकू काढून पत्नीवर वार केला.

तिने कसाबसा वार चुकविला, मात्र तिच्या पाठीला दुखापत झाली. जानकी मुलीच्या मदतीसाठी धावल्या असता, राजेंद्रने सासूच्या छाती, हातावर वार करून गंभीर जखमी केले. शेजाऱ्यांनी धावपळ करीत दोघींनाही जवळच्या रुग्णालयात नेले. तिथून मेयोत पाठविण्यात आले. जानकी यांची अवस्था गंभीर असल्याने त्यांच्यावर शस्त्रक्रिया करण्यात आली. पारडी पोलिसांनी गुन्हा दाखल करीत आरोपीला अटक केली आहे.