Electoral Bond SBI Non Disclosed Information: भारतीय स्टेट बँकेने निवडणूक आयोगाला २५०० कोटी रुपयांच्या निवडणूक रोख्यांची माहिती दिलेली नाही. हे निवडणूक रोखे कुणी खरेदी केले होते, याचा खुलासा होण्याची आवश्यकता असून ही भाजपची हफ्ता वसुली असल्याचा गंभीर आरोप काँग्रेसचे महासचिव खासदार जयराम रमेश यांनी केला.

भारतीय स्टेट बँकेने निवडणूक रोख्यांसंदर्भातील माहिती केंद्रीय निवडणूक आयोगाला दिली आहे. ही माहिती निवडणूक आयोगाने १४ मार्चला संकेतस्थळावर अपलोड केली. परंतु यावेळी जवळपास अडीच हजार कोटी रुपयांच्या निवडणूक रोख्यांची माहिती दिलेली नसल्याचे उघड झाले आहे.

निवडणूक रोख्याच्या प्रकारातून ‘चंदा दो, धंदा लो’, हफ्ता वसुली, लाच घेण्याचा हा नवा प्रकार व बनावट कंपन्यांमधून मनी लॉँड्रींग करण्यात आल्याचा आरोप खासदार जयराम रमेश यांनी आज केला. एसबीआयने मार्च २०१८ मध्ये रोख्यांची पहिली खेप विकली. यातील २५०० कोटी रुपयांच्या निवडणूक रोख्यांची माहिती उघड झालेली नाही. हे रोखे कुठे आहेत, असा सवाल रमेश यांनी केला आहे. (Latest Marathi News)

मेघा इंजीनिअरिंगचे महाराष्ट्र कनेक्शन

निवडणूक रोखेप्रकरणात हैदराबाद येथील मेघा इंजीनिअरिंग अँड इन्फ्रास्ट्रक्चर लिमीटेड (एमईआयएल) या कंपनीने सर्वाधिक रोखे खरेदी करण्यांमध्ये समावेश आहे. याच कंपनीला ठाणे ते बोरिवली हा बोगदा तयार करण्याचे १४ हजार ४०० कोटी रुपयांचे कंत्राट मिळाले आहे. एलअँडटी या कंपनीला डावलून या कंपनीला हे कंत्राट मिळाल्याचे आता स्पष्ट झाले आहे. या कंपनीने हे रोखे एप्रिल २०२३ मध्ये खरेदी केले होते. दुसर्याच महिन्यात हे कंत्राट या कंपनीला मिळाल्याचे स्पष्ट झाले.