नागपूर - भारतीय लष्कराच्या दोन तुकड्या पूर बचाव कार्यासाठी अंबाझरी परिसरात उपकरणे आणि बोटीसह तैनात करण्यात आल्या. भारतीय सैन्याने विविध वयोगटातील सुमारे ४० लोकांची सुटका केली आणि त्यांना वैद्यकीय मदतही पुरवली. परिस्थिती आता नियंत्रणात आहे.

शहर आणि लगतच्या परिसरात झालेल्या मुसळधार पावसामुळे अंबाझरी, सीताबर्डी, मोर भवन, व्हरायटी चौक आदी भागात पहाटेच्या सुमारास पाणी साचले होते.

आपत्कालीन परिस्थिती लक्षात घेत जिल्हाधिकारी कार्यालयाने लष्कराच्या उत्तर महाराष्ट्र आणि गुजरात सब अरियाकडे पूर मदत तुकडीची मदत मागविली होती.

परिस्थिती नियंत्रणात असली तरी नागपूर, कामठी आणि चंद्रपूरमधील पूरस्थिती लक्षात घेता नागपूर जिल्हा प्रशासनाने भारतीय लष्कराच्या तुकड्यांना सतर्कतेचा इशारा दिला आहे.