नागपूर - भारतीय विज्ञान काँग्रेसमध्ये मोदी-शहा विरुद्ध बोलल्या म्हणून राहीबाई पोपेरे यांना थांबविण्यात आल्याच्या बातम्या काही प्रसारमाध्यमांमध्ये चालू होत्या. त्यावर राहीबाईंचे स्पष्टीकरण आले आहे.

आपल्या पत्रात राहीबाई म्हणतात, 'मला सन्मानजनक वागणूक मिळाली असून मला माझे म्हणणे या व्यासपीठावरून मांडता आले. तरी माझा अवमान झाला, वा मला बोलू दिले नाही हे वृत्त निराधार आहे.' महिला विज्ञान काँग्रेसच्या संयोजक डॉ.कल्पना पांडे यांनी पत्रकार परिषद घेत ही माहिती दिली.

राष्ट्रीय विज्ञान काँग्रेसमध्ये पद्मश्री पोपेरे यांना आंमत्रित करून त्यांच्या ज्ञानाचा व अनुभवाचा फायदा येथे भेट देणाऱ्या वैज्ञानिक व विज्ञानाच्या अभ्यासकांना व्हावा हाच शुध्द हेतु होता. त्यानुसार दिनांक ५ जानेवारी २०२३ रोजी त्यांनी महिला विज्ञान काँग्रेससह एकूण तीन आयोजनात सहभाग घेवून उपस्थितांना मार्गदर्शन केले. या दरम्यान पोपेरे यांना भाषण देण्यापासून थांबवण्यात आले नव्हते असे सांगत डॉ. पांडे यांनी पोपेरे यांनी पाठविलेले निवेदन पत्रकारांना दाखविले. यावेळी कुलगुरु डॉ सुभाष चौधरी आणि शेतकरी विज्ञान काँग्रेसचे संयोजक डॉ. प्रकाश इटनकर उपस्थित होते.