Nagpur Madgaon Special Train: विदर्भ आणि कोकण या दोन विभागांना जोडणारी नागपूर-मडगाव विशेष रेल्वेगाडी ३० मार्चऐवजी ८ जूनपर्यंत धावणार आहे.

गेल्या दोन वर्षांपासून गाडी क्रमांक ०११३९ नागपूर-मडगाव आणि गाडी क्रमांक ०११४० मडगाव-नागपूर रेल्वेगाडीची सेवा वाढवण्यात येत आहे. प्रवाशांसाठी अत्यंत महत्त्वाची असलेली रेल्वेगाडी कायमस्वरूपी वेळापत्रकाद्वारे न चालवता, दर दोन ते तीन महिन्यांची सेवा वाढवून ही गाडी कोकण आणि मध्य रेल्वेकडून विशेष तिकीट दरासह चालवण्यात येत आहे.

कोकण आणि मध्य रेल्वे प्रशासनाकडून प्रवाशांच्या मागणीचे कारण देत, गेल्या दोन वर्षांत अनेक वेळा या गाडीच्या सेवेत वाढ झाली आहे. तसेच, ३० डिसेंबर २०२३ ते ३० मार्च २०२४ पर्यंत नागपूर-मडगाव आणि ३१ मार्च २०२४ पर्यंत मडगाव-नागपूर या रेल्वेगाडीच्या सेवेत वाढ करण्यात आली होती.

आता पुन्हा नागपूर-मडगाव गाडीची सेवा ८ जूनपर्यंत आणि मडगाव-नागपूर गाडीची सेवा ९ जूनपर्यंत वाढवण्यात आली आहे. दरम्यान, या गाडीला प्रवाशांचा प्रतिसाद असून ती नागपूर ते मडगांव या पट्ट्यातील अनेक महत्त्वाच्या ठिकाणांशी जोडते. मात्र रेल्वे प्रशासन यास कायमस्वरूपी वेळापत्रकानुसार का चालवत नाही, असा प्रश्न प्रवाशांनी केला आहे.