Ajit Pawar-Anand Adsul Meeting: अमरावती लोकसभा मतदारसंघाचे माजी खासदार आणि सध्याचे इच्छुक आनंदराव अडसूळ यांनी रविवारी (ता. तीन) अमरावतीत आलेले उपमुख्यमंत्री अजित पवार यांनी भेट घेत त्यांच्याशी वार्तालाप केला. त्यामुळे राजकीय चर्चांना उधाण आले असून सर्वच राजकीय चर्चा जाहीर केल्या जात नसतात, असे सांगत श्री. अडसूळ यांनी सस्पेन्स वाढविला आहे.

राष्ट्रवादी काँग्रेसचे नेते संजय खोडके व आमदार सुलभा खोडके यांचे पुत्र यश यांच्या विवाहसोहळ्याला उपस्थित राहण्यासाठी उपमुख्यमंत्री अजित पवार आज अमरावतीला आले होते. अजित दादांसोबतच राजकीय क्षेत्रातील अनेक मातब्बर मंडळींनी या सोहळ्याला हजेरी लावली. मात्र सर्वाधिक केंद्रस्थानी राहिली ती अजितदादांच्या अगदी जवळ बसून आनंदराव अडसूळ यांनी त्यांच्याशी केलेली चर्चा.

खासदार नवनीत राणा यांच्याकडून मागील लोकसभा निवडणुकीत पराभूत झालेले शिवसेना नेते आनंदराव अडसूळ हे परत एकदा मैदानात येण्याच्या तयारीत आहेत. कालच त्यांनी त्याबाबतची आपली भूमिका स्पष्ट केली होती. खासदार नवनीत राणा यांच्या जातप्रमाणपत्राच्या मुद्यावरून ते पुन्हा एकदा प्रकाशझोतात आले. (Latest Marathi news)

दोन आठवड्यात नवनीत राणा यांच्या जातप्रमाणपत्राबाबतचा सर्वोच्च न्यायालयाचा निकाल अपेक्षित असल्याने शहरासह जिल्ह्यातील राजकीय क्षेत्राचे त्याकडे लक्ष लागले आहे. दुसरीकडे आनंदराव अडसूळ यांनीसुद्धा अमरावती लोकसभेवर शिवसेनेच्या वतीने दावा सांगितल्याने राजकीय मंडळींच्या भुवया उंचावल्या आहेत. त्यातच महायुतीकडून अद्याप राणा यांच्या नावाची घोषणा झालेली नाही. दुसरीकडे अडसूळ यांनी आपणच उमेदवार असणार, असे भाकीत केले आहे. त्यातच रविवारी अजितदादा आणि त्यांच्यात झालेल्या चर्चेमुळे तर्कवितर्क लावल्या जात आहेत.