नागपूर - सणांवर महागाईचे सावट असताना आता पावसामुळे आवक कमी झाल्याने गणेशोत्सवाच्या पूर्वसंध्येला फुलांचे भाव वाढले आहेत.

आज बाप्पाचे आगमन आणि काल हरतालिकामुळे फुलांची मागणी वाढल्याने भाव आकाशाला भिडले आहे. दोनच दिवसांनी गौरीचे आगमन होणार फुलांचे भाव अजून वधारणार आहे.

दरवर्षी गणेशोत्सव, ऋषीपंचमी, गौरी पूजनाच्या काळात फुलांची मागणी वाढत असते. यंदा मात्र, अचानक आलेल्या पावसाने महागाई अधिकच वाढली आहे.

सणासुदीमुळे मागणी वाढत असली तरी यंदा मात्र पावसामुळे फुलांचे नुकसान झाले आहे. मागणी कमी आणि आवक वाढल्याने भाववाढ झालेली आहे. दोन दिवसांपूर्वी फुलांचे भाव सामान्य होते, दोन दिवस पोळ्याच्या दिवशी झालेल्या पावसाने फूल शेतीचे नुकसान झाले.

पूर्वी ३० आणि ४० रुपये किलोने असलेला झेंडू थेट ७० ते ९० रुपये किलोवर गेला. हैदराबाद बाजारपेठेत वाढ झाल्याने नागपुरातील आवक कमी झाली आहे.

आता फक्त स्थानिक फुलांवर अवलंबून राहावे लागणार आहे. पावसाच्या आशीर्वादावर पुढील व्यवसाय अवलंबून राहणार आहे.

पावसामुळे फुलशेतीचे मोठ्या प्रमाणात नुकसान झाले. सणासुदीच्या निमित्ताने फुलांची मागणीही वाढलेली आहे. त्यामुळे फुलांच्या दरात विक्रमी भाव वाढ झालेली आहे. दोन दिवसाने गौरीपूजन असल्याने मागणी वाढणार असल्याने भाव वाढ होणार आहे.

जयंत रणनवरे, घाऊक फूल विक्रेता.

फूल आधीचे दर आजचे दर

(रु. प्रतिकिलो) (रु. प्रतिकिलो)

झेंडू ३० ते ४० ७० ते ९०

लहान झेंडू ४० ते ५० ८० ते ९०

गुलाब ७० ते ८० ३०० ते ३५०

गुलाब ७० ते ९० २५० ते ३००

शेवंती ८० ते १०० २०० ते २५०

कुंदा ३५०ते ४०० ८०० ते ८५०

निशिगंधा १०० ते १२० ६०० ते ८००