नागपूर : येथील शासकीय दंत महाविद्यालय व रुग्णालयातील पदव्युत्तर बाल दंतरोग विभागप्रमुखांसह एका सहयोगी प्राध्यापकाची बदली झाली. या बदल्यांमुळे पदव्युत्तर अभ्यासक्रमाच्या विद्यार्थ्यांसह पीएचडी करणाऱ्या विद्यार्थ्यांसह रुग्णांचे नुकसान होत आहे.

या विभागात फेलोशिपचे विद्यार्थी नोंदणीकृत आहेत. यांचे शैक्षणिक नुकसान होत असताना शासन मात्र बघ्याची भूमिका घेत आहे. विशेष असे की, जुलै महिन्यात भारतीय दंत परिषदेकडून निरीक्षण होणार आहे. विभागाप्रमुखाशिवाय बाल दंतरोग विभागाची मान्यता धोक्यात येण्याची दाट शक्यता यामुळे निर्माण झाली आहे. (Latest Marathi News)

शासनाने प्रशासकीय बदल्यांचे कारण देत शासकीय दंत महाविद्यालय व रुग्णालयातील प्राध्यापक आणि सहयोगी प्राध्यापक यांच्या बदल्या केल्या. मात्र एकाच विभागातील दोन दंत चिकित्सकांच्या अचानक बदल्या झाल्याने या विभागातील दंत रुग्णसेवा प्रभावित झाली. केवळ एकाच सहयोगी प्राध्यापकावर रुग्णांचा भार आला आहे. (Marathi Tajya Batmya)

त्यातही दंत महाविद्यालयातील पदव्युत्तर अभ्यासक्रम, पीएचडी अभ्यासक्रम तसेच फेलोशिपच्या विद्यार्थ्यांना शिकवणारे कोणीच नाही. यामुळे एकीकडे या विद्यार्थ्यांचे नुकसान होत आहे, तर दुसरीकडे या विभागात बालदंत रुग्णांना तज्ज्ञांच्या सेवेपासून वंचित राहण्याची वेळ आली आहे.

रुग्णहित लक्षात घेत नागपुरातील शासकीय दंत महाविद्यालयात बाल दंतरोग शास्त्र विभागाचे विभागप्रमुख डॉ. रितेश कळसकर आणि डॉ. राकेश बहादुरे यांची बदली रद्द करण्यात यावी, अशा आशयाचे निवेदन विद्यार्थ्यांनी अधिष्ठाता डॉ. अभय दातारकर यांच्याकडे दिले आहे.

संचालकांनाही निवेदन

होणारे शैक्षणिक नुकसान लक्षात घेत येथील विद्यार्थ्यांनी वैद्यकीय शिक्षण विभागाचे सचिव, या विभागाचे आयुक्त तसेच संचालक यांना निवेदन सादर केले आहे. डॉ. कळसकर यांची बदली औरंगाबाद येथील शासकीय दंत रुग्णालयात केली आहे.

मात्र या शासकीय दंत महाविद्यालयात बाल दंत रोग विभागाच नाही. यामुळे डॉ. कळसकर यांच्या हाताला काम नाही, असे बोलले जात आहे. मुंबईतील दंत रोग विभागात बदली केल्यास ते किमान विद्यार्थ्यांना शिकवू शकतील.