नागपूर : पुढच्या काळात नागपूर पोलिस मोकाट श्वानांच्या मागे किंवा त्यांच्यावर नजर ठेवत असेल तर आश्चर्य वाटून घेऊ नका. गुन्हेगारांवर नजर ठेवणाऱ्या नागपूर पोलिसांना आता शहरातील भटक्या श्वानांद्वारे चावा घेतलेल्यांनी दाखल केलेल्या तक्रारी आणि त्यांचा त्रास होणाऱ्या परिसराचीही माहिती द्यावी लागणार आहे. सर्वोच्च न्यायालयाच्या निर्देशानुसार पोलिस आयुक्तांनी शहरातील पोलिस ठाण्यांसाठी हे परिपत्रक काढले आहे.

शहरात गेल्या काही दिवसांपासून भटक्या कुत्र्यांचा विषय चांगलाच चर्चेत आहे. याबाबत उच्च न्यायालयाने पोलिस आणि महापालिकेला वेळोवेळी सूचना दिल्या आहेत. त्यानुसार एक नियंत्रण समिती स्थापन करण्यात आली. त्यानुसार पोलिस स्टेशन परिसरात किती मोकाट कुत्री आहेत, याबाबत शहानिशा करून त्याबद्दलची माहिती तयार करण्याचे निर्देश नागपूर पोलिस आयुक्तांनी दिले आहेत. तसेच भटक्या कुत्र्यांना पकडण्यासाठी आणि पुढील कारवाई करण्यासाठी महानगरपालिका आणि संबंधित मॉनिटरिंग कमिटीला सूचित करावे, अशा सूचनाही पोलिस आयुक्तांनी काढलेल्या पत्रकात देण्यात आल्या आहेत.

नागपूर शहरातील रस्त्यांवर आणि सार्वजनिक ठिकाणी भटक्या कुत्र्यांना खाद्यपदार्थ देणाऱ्या नागरिकांना २०० रुपयांपेक्षा जास्त दंड आकारण्याचा निर्णय महापालिकेने घेतला होता. महापालिकेचा हा निर्णय मुंबई उच्च न्यायालयाच्या नागपूर खंडपीठाने योग्य ठरवत तो कायम ठेवला होता. मात्र, हायकोर्टाचा हा आदेश सर्वोच्च न्यायालयाने रद्दबातल केला.

त्यानंतर उच्च न्यायालयाने नागपूर पोलिसांनाही यासंदर्भातील निर्देश दिले आहेत. त्यामुळे नागपूर पोलिसांमागे हे अजब काम लागल्याच्या प्रतिक्रिया उमटत आहेत. याबाबत पोलिस आयुक्त अमितेश कुमार यांना विचारणा केली असता, त्यांनी याला दुजोरा दिला. मात्र, अधिक काही बोलणे टाळले.