नागपूर : पंतप्रधान नरेंद्र मोदी रविवारी समृद्धी महामार्ग आणि मेट्रो रेल्वेच्या उद्‍घाटनासाठी नागपूरला येत आहे. त्यांच्याकडून नागपूरवासीयांच्या आणखी अपेक्षा उंचावल्या आहेत. दरम्यान ते आपल्या दौऱ्यात आणखी मोठ्या घोषणा करणार आहेत. त्यामुळे संपूर्ण वैदर्भीयांनी त्यांच्या स्वागतासाठी स्वयंस्फूर्तीने यावे, असे आवाहन भाजपचे प्रदेशाध्यक्ष चंद्रशेखर बावनकुळे यांनी केले.

काँग्रेसने आजवर विदर्भाची उपेक्षाच केली. नागपूरला उपराजधानीचा दर्जा दिला. करार आणि घोषणा केल्या, मात्र दिले काहीच नाही. केंद्रात आणि राज्यात भाजपचे सरकारच येताच नागपूर तसेच विदर्भात विकासाची गंगा वाहू लागली आहे. मोदी, गडकरी आणि फडणवीस यांच्यामुळे विदर्भाला अच्छे दिन आले आहे. समृद्धी महामार्गाने संपूर्ण महाराष्ट्र विदर्भाशी जोडला जाणार आहे. हा मार्ग होऊ नये याकरिता महाविकास आघाडीच्या कार्यकाळात बरेच प्रयत्न करण्यात आले. मुख्यमंत्री एकनाथ शिंदे यांना ते चांगले ठावूक असल्याचे यावेळी चंद्रशेखर बावनकुळे यांनी सांगितले. पत्रकार परिषदेला भाजपचे शहराध्यक्ष आमदार प्रवीण दटके, आमदार मोहन मते,

मोदी नागपूरला काय देणार

आमदार कृष्णा खोपडे, प्रदेश उपाध्यक्ष संजय भेंडे, संदीप जोशी, अर्चना डेहनकर, मिलिंद माने, सुधाकर कोहळे, चंदन गोस्वामी, शिवानी दाणी आदी उपस्थित होते.

भंडारा-गोंदिया प्रस्तावित

समृद्धी महामार्गाला भंडार आणि गोंदिया भविष्यात जोडण्यात येणार आहे. त्यामुळे या भागात उद्योग येतील आणि येथील धान व इतर शेतमाल मुंबईत जातील. त्यामुळे भंडार व गोंदियातही समृद्धी येणार आहे. उद्योजकांनाही कनेक्टिव्हीटी मिळणार असल्याने पश्चिम महाराष्ट्रात उद्योग स्थापन करण्यासाठी खर्चात बचत होईल, असा दावाही यावेळी बावनकुळे यांनी केला.

मेट्रोचा तिसरा टप्पाही होणार

मेट्रो टप्पा एकचे लोकार्पण आणि दुसऱ्या टप्प्याचे भूमिपूजन मोदी यांच्या हस्ते होणार आहे. आम्ही नागपूर शहराच्या सभोवतालच्या तालुक्यांना मेट्रोने जोडण्यासाठी तिसरा टप्प्याचीही मागणी करणार आहोत. त्यामुळे कन्हान, कामठी, रामटेक, सावनेर, काटोल आदी तालुक्यांमधील नागरिकांच्या ते सोयीचे होईल, असे बावनकुळे यांनी सांगितले.

आठ ठिकाणी उद्घाटन

समृद्धी महामार्गाचा लोकार्पण सोहळा एकूण आठ ठिकाणी होणार आहे. नागपूरमध्ये प्रत्यक्ष तर वर्धा, वाशीम, शिरडी, जालना, बुलढाणा, औरंगावाद येथे तो ऑनलाईन होणार आहे. त्याच जिल्ह्यातील आमदार, मंत्री व लोकप्रतिनिधी तेथून यात सहभागी होणार आहेत.