नागपूर : अजनी चौकातील भवानी चेंबर येथे असलेल्या पॉश रेडीफाईन व प्रोफेशन फॅमेली सलून ॲंड पार्लरमध्ये सुरू असलेल्या सेक्स रॅकेटवर गुन्हे शाखेने छापा घातला. या छाप्यात देहव्यापार करणाऱ्या दोन तरूणींना ताब्यात घेण्यात आले. रॅकेट चालविणाऱ्या दलालाला अटक करण्यात आली. रवी दशासन चौधरी (जुनी अजनी, चुना भट्टी) असे दलालाचे नाव आहे.

पोलिसांनी दिलेल्या माहितीनुसार, आरोपी रवी चौधरी याचे रेडीफाईन व प्रोफेशन फॅमेली सलून ॲंड पार्लर आहे. त्याच्या सलूनमध्ये मसाज करण्यात येत होती. पुरूष ग्राहकांना तरूणींकडून मसाज देऊन त्यानंतर शारीरिक संबंध प्रस्थापित करण्याची व्यवस्था करण्यात आली होती. त्यामुळे गेल्या काही महिन्यांपासून या पार्लरमध्ये मसाज करणाऱ्या ग्राहकांची संख्या झपाट्याने वाढली. त्यामुळे रवी चौधरी याने वाढती

ग्राहक संख्या बघता पार्लरमधील तरूणींना देहव्यापार करण्यास प्रोत्साहन दिले. ग्राहकाशी संबंध ठेवणाऱ्या तरूणींची पार्लरमध्ये कर्मचारी म्हणून भरती केली. तो मुलींकडून थेट देहव्यावसाय करून घेत होता. रवीच्या सलूनमध्ये रेक्स रॅकेट चालते, अशी माहिती गुन्हे शाखेचे पोलिस उपायुक्त चिन्मय पंडित यांना मिळाली. त्यांनी सापळा रचून कारवाई करण्याचे आदेश दिले. त्यावरून पोलिसांनी आपल्या पंटरला या सलूनमध्ये पाठविले. तेथे रवीशी सौदा झाल्यानंतर रवीने दोन मुलींना बाहेर बोलावले.

त्यापैकी एका मुलीची निवड करून तिच्यासोबत खोलीत पाठविले. पंटरने इशारा करताच दबा धरून बसलेल्या पोलिस पथकाने या सलूनमध्ये धाड घातली. त्यावेळी पंटर आणि मुलगी एका खोलीत मिळून आले. पोलिसांनी या सलूनमधून दोन मुलींची सुटका केली. याप्रकरणी बजाजनगर पोलिस ठाण्यात पीटा कायद्यान्वये गुन्हा नोंदवून नवी चौधरी याला अटक केली. ही कामगिरी पोलिस उपनिरीक्षक मंगला हरडे, संदीप चंगोले, चेतन, महिला शिपाई रिना जाऊरकर, प्रतिमा यांनी केली.