नागपूर : आजही ग्रामीण भागातील अनेक ठिकाणी मासिक पाळीदरम्यान मुलींकडून कापडाचा उपयोग होता. यातून आजार होण्याची भीती असते. त्यामुळे किशोरवयीन मुलींना सॅनिटरी नॅपकीन देण्याची योजना जिल्हा परिषदच्या महिला व बाल कल्याण विभागाची आहे. अंगणवाडीतून या नॅपकीनचा पुरवठा होणार असून एका मुलीला ४१ नग देण्यात येणार आहे.

मासिक पाळीच्या दिवसांमध्येही दिवसभर बाहेर राहून काम करताना किंवा शाळा, कॉलेजात जाताना ग्रामीण भागातील बऱ्याचश्या मुली कापडाचा उपयोग करतात. वापरलेला कापड कुठेतरी अडगळीत अंधाऱ्‍या ठिकाणी ठेवला जातो. त्यामुळे रॅशेस, जंतूसंसर्गाचा धोका संभवतो. या गोष्टी टाळण्यासाठी सॅनिटरी नॅपकिन वापरणे आवश्यक आहे. मात्र ग्रामीण भागातील मुली, महिलांना याबाबत कल्पना नाही. नॅपकिनसाठी येणारा खर्च त्यांना परडत नाही. दिवसाला दोनशे रुपयेही कमवू न शकणाऱ्यांना मासिक पाळीवर मोठा खर्च करणे परवडत नाही.

दुसरीकडे हातावर पोट असणाऱ्‍या महिलाही सर्वसाधारणपणे कापडच वापरतात. पाळीच्या दोन-तीन दिवसांमध्ये या महिला घरीच राहतात. नॅपकीन विकत घेणे त्यांना परवडत नाही. काम करताना कापड बदलणे शक्य होत नाही.

कापड बदलले तरी आधी वापरलेले कापड ठेवायचे कुठे, असा प्रश्न निर्माण होतो. यावर उपाय म्हणून अंगणवाडीच्या माध्यमातून ११ ते १८ वयोगटातील किशोरवयीन मुलींना ४१ नग सॅनिटरी नॅपकीन देत जनजागृती करण्याचा मानस जिल्हा परिषदेचा आहे. त्याचे फायदेही सांगितले जाणार आहे. त्यासाठी ५० लाखांचा खर्च अपेक्षित आहे.

कापडाच्या वापरामुळे आजार होण्याची भीती असते. सॅनिटरी नॅपकीन हे त्यांच्या आरोग्याच्या दृष्टीने चांगले आहे. याचा नियमित वापर त्यांनी केला पाहिजे. त्यामुळे ग्रामीण भागातील किशोरवयीन मुलींना अंगणवाडीच्या माध्यमातून सॅनिटरी नॅपकीन वाटप केले जाणार आहे. ६ महिन्यात लागणारे नॅपकीन एकाच वेळी देण्यात येतील.

-अवंतिका लेकुरवाळे, सभापती, महिला व बाल कल्याण