Fake Journalist fraud: शेती आणि प्लॉट परस्पर नावावर केल्याप्रकरणाची बातमी छापण्याची धमकी देत, पावणेपाच लाख रुपये घेऊन फसवणूक करणाऱ्या एका यूट्यूब पत्रकाराविरोधात सीताबर्डी पोलिसांनी गुन्हा दाखल केला आहे. याप्रकरणी विवेक विठ्ठलराव धारट (वय ३५, रा. नक्षत्र कॉलोनी, सावनेर) यांनी दिलेल्या तक्रारीवरून पोलिसांनी गुन्हा दाखल केला आहे.

पोलिसांनी दिलेल्या माहितीनुसार, विवेक विठ्ठलराव धारट यांची मौजा दहेगाव येथे वडीलोपार्जीत शेती व प्लॉट आहे. वडिलांचा मृत्यू झाल्यावर त्यांच्या आत्याने एकटीच वारसदार असल्याचे सांगून शेती आणि प्लॉट हे परस्पर आपल्या नावावर करून घेतले होते. याबाबत त्यांनी गिट्टीखदान पोलिसांकडे तक्रार दाखल केली होती. दरम्यान ही बातमी दाखविण्याकरिता धारट या पत्रकाराकडे गेले.

तिथे पत्रकाराने त्याची सिटीसर्वे कार्यालयात ओळख असल्याचे सांगून मी तुमचे काम करून देईल अशी बतावणी केली. त्यासाठी त्याने वकील व इतर खर्चासाठी पाच लाख रुपयाची मागणी केली. त्यांच्यावर विश्‍वास ठेवून विवेक यांनी त्याला ४ लाख ७० हजार ‘गुगल पे’वर दिले. मात्र, त्याने पाच महिने झाल्यावरही काम न केल्याने त्यांनी सीताबर्डी येथे तक्रार दाखल केली. यानंतर त्यांनी सीताबर्ड पोलिसांकडे केलेल्या तक्रारीवरून पोलिसांनी त्याच्याविरोधात गुन्हा दाखल केला.